10 сентября 2010 г.
«Çитĕнÿсем пулсан малашлăха шанчăклăн пăхма хавхалантараççĕ», –тет «Урмарская» ăратлă кайăк-кĕшĕк фабрикин директорĕ Н. Петров хуçалăхри ĕç-хĕлсем пирки сăмах тапратсан.
Эпĕ мĕн шухăшпа килнине пĕлсен, мана кăсăклантаракан ыйтупа хуçалăхăн тĕп агрономĕпе В.Нарзаевпа калаçмаллине систерчĕ. «Ĕçе кадрсем татса параççĕ», - тенĕ пек ку хуçалăхра кашни хăйĕн ыйтăвĕсене пĕлсе, татăклăн татса параççĕ. Çĕр ĕçĕпе çыхăннă ыйтусене кунти тĕп агрономран лайăх пĕлекенни çук тесен те тĕрĕсех. Ял хуçалăх институтне вĕренсе пĕтернĕренпех ялта пурăнса хăйĕн профессипе ĕçлет. «Урмарская» ăратлă кайăк-кĕшĕк фабрикинче вара - 8 çул ытла вăй хурать. Вăл чăннипех те хăйĕн ĕçне юратса пурнăçлакан специалист пулни акнă кĕрхи культура шăтса тухнă уйра пулсан палăрчĕ. Вячеслав Васильевич коллектив ĕçĕпе чăннипех те савăнма пĕлет. «Çĕре варăнтарнă пысăк репродукциллĕ пĕрчĕсем хыçалтанах шăтса тухни савăнтарать, ĕçлес кăмăла çĕклентерет. Агротехникăлла пур требованисене те пурнăçласа пырса акатпăр. Вăрлăха акиччен «Фенорам-супер» препаратпа имçамлатпăр. Унтан та ытларах вăрлăхлăх тĕш тырăна хатĕрлеме пĕлнинчен те нумай килет. Ку ĕçре О.Ефимов, В.Степанов, С.Ефимов, С.Петров, О.Кудряшов рабочисем чылайранпах вăй хураççĕ, хăйсен ĕçне пĕлсе пурнăçлаççĕ. Хальхи вăхăтра вĕсем çитес çул акма çурхи пĕрчĕллĕ культурăсене кондицие çитерессишĕн тăрăшаççĕ. Кĕрхисен тухăçĕ мĕнле пуласси субъективлă тата объективлă сăлтавсемсĕр пуçне, вăрлăхран та килет. Вĕсем çурхисенчен шăрăха та ытларах чăтаççĕ, маларах пулса çитеççĕ, пахалăхĕ те лайăхрах, тухăçĕ те пысăкрах пулать. Кĕркунне ака ирттерсен çуркунне ял ĕçченĕн те ĕçĕ сахалланать. Кĕрхисене эпир 1200 гектар çинче акма палăртнă, пĕлтĕр 1040 гектар акнă пулнă. Паянхи куна вара 1000 гектар ытла акма пултартăмăр, çав шутран - 300 гектарĕ Кавал ял тăрăхĕн территорийĕнче. Н.Петров, С.Николаев, Д.Бойков, А.Клементьев трактористсем пĕрин хыççăн тепри тракторĕсене уй тăрăх кĕрлеттерсе акана вĕçлессишĕн тăрăшаççĕ. Вĕсене Н.Григорьев, М.Алексеев, А.Федоров, Д.Федоров сеяльщиксем пулăшса пыраççĕ. Вăрлăхне Э.Семеновпа С.Архипов водительсем турттарса ĕлкĕрсе пыраççĕ. Акма çĕр хатĕрлекенсем - Г.Силеровпа Н.Петров та ырă ята тивĕçлĕ. Автомашинăсемпе кăна мар, михĕсем çине тиесе тракторсемпе те вăрлăха турттарса тăратпăр. Кунта Г.Судюковпа С.Архипов МТЗ-82 тракторсемпе турттарса тăчĕç. Сăмах май каласан, Г.Судюков нумай çулсем ĕнтĕ хуçалăхра тракторпа вăй хурать. Пурнăçламан ĕçĕ те çук пулĕ унăн. Утă-улăм хатĕрленĕ тапхăрта КУН-10 агрегатпа транспортсем çине тиесе тăчĕ. Унтан 63 гектар çинче рапс акрĕ. Çĕртме тунă çĕрте Т-150 тракторсемпе 5 корпуслă плугсем çакса О.Григорьевпа А.Васильев хăйсен хастарлăхне кăтартаççĕ, савăнмалăх пур, тырă пуссисем тап-таса та сип-симĕс. Çанталăк сивĕтиччен 10-15 сантиметр ÿссе çитĕнеççех. Çитес çул, çанталăкĕ аван тăрсан, тупăшĕ çителĕклех пулĕ», - тет агроном.