03 сентября 2010 г.
Октябрĕн 10-мĕшĕнче район депутачĕсен Пухăвĕн, Вăрмар хула, ял тăрăхĕсен депутачĕсен тата ял тăрăхĕн пуçлăхĕсен кандидатурисене тăратас тапхăр августăн 30-мĕшĕнче вĕçленчĕ. Сентябрĕн 3-мĕшĕ тĕлне районĕпе 384 кандидата халăх «тарçи» пулма регистрациленĕ. Вĕсен шутĕнчен район депутачĕсен мандатне илме - 64, ял пуçлăхĕсене суйланма - 55, ял тăрăхĕсен депутачĕсем пулма - 265 çын хăйсен кандидатурине тăратрĕç. 384-шĕ те регистраци витĕр тухнă. Халĕ Вăрмар территори суйлав комиссийĕ участоксенчи суйлав комиссийĕсене йĕркелесе çитерес енĕпе ĕçлет. Ĕç коллективĕсемпе суйлава хутшăнакан партисемпе обществăлла организацисем сентябрĕн 9-мĕшĕччен вырăнти суйлав комиссийĕсене йĕркелессипе çыхăннă тĕрлĕ сĕнÿсем пама пултараççĕ. Çак ĕçе Вăрмар территори суйлав комиссийĕн сентябрĕн 12-мĕшĕнче вĕçне çитермелле. Саккунпа килĕшÿллĕн сентябрĕн 11-мĕшĕнчен массăллă информаци хатĕрĕсенче суйлав умĕнхи агитаци тапхăрĕ 28 куна пырать (сентябрĕн 11-мĕшĕнчен пуçласа октябрĕн 9-мĕшĕ таран). Çак тапхăрта суйлава хутшăнакан кандидатсем район хаçатĕнче суйлавçăсене хăйсен программисемпе паллаштарма пултараççĕ.
Суйлав умĕнхи агитаци материалĕсем хăш номерте тухасси шăпа янă (жеребьевка) хыççăн паллă пулать. Жеребьевка сентябрĕн 7-мĕшĕнче редакци çуртĕнче 12 сехетре иртет.