27 августа 2010 г.
Районти Культурăпа кану центрĕнче вĕрентÿ ĕçченĕсемпе иртнĕ августри конференцие ЧР Патшалăх Канашĕн председателĕн заместителĕ - Патшалăх строительствин тата вырăнти хăй тытăмлăх комитечĕн председателĕ, «Единая Россия» партин фракци членĕ Г.Васильев, ЧР Патшалăх Канашĕн депутачĕ, А.Разумов, Вăрмар район администрацийĕн пуçлăхĕ К.Никитин, район администрацийĕн пуçлăхĕн заместителĕ - райадминистрацин вĕрентÿ тата çамрăксен политикин пайĕн начальникĕ Ю.Соколов, районти шкул директорĕсем, вĕрентекенсем хутшăннă.
Вăрмар район администрацийĕн пуçлăхĕ К.Никитин вĕрентекенсене çĕнĕ вĕренÿ çулĕ çывхарса килнĕ ятпа саламларĕ, ачасене тĕплĕ пĕлÿ, воспитани парас енĕпе ăнăçусем сунчĕ. Республика шайĕнче пысăк ÿсĕмсем тунă 9 вĕрентекене 50-шар пинлĕх грант çĕнсе илнĕ ятпа свидетельствăсем пачĕ. Унтан ЧР Патшалăх Канашĕн председателĕн заместителĕ Г.Васильев сăмах илчĕ. Вăл вĕрентекенсене профессиллĕ ĕçре пысăк ÿсĕмсем тума, Раççей, Республика, шайĕнче пысăк кăтартусемпе савăнтарма çирĕп сывлăх сунчĕ, «Раççей Федерацийĕн пĕтĕмĕшле вĕрентĕвĕн хисеплĕ ĕçченĕ» знакпа Шăхаль шкулĕнчи технологи предметне вĕрентекен А.Горбунова, Арапуç шкулĕнчи биологипе хими учительне Н.Ивановăна наградăларĕ. Унсăр пуçне 7 вĕрентекен ЧР Вĕрентÿпе çамрăксен политикин министерствин Хисеп грамотине, поселокри «Березка» ача сачĕ 200 пин тенкĕ грант çĕнсе илнĕ ятпа свидетельствăна тивĕçрĕç.
«Вăрмар районĕнчи вĕрентÿ ĕçĕн инновациллĕ аталанăвĕ: учительсен пултарулăхне ÿстересси, хальхи шкул инфратытăмĕ» темăпа райадминистрацин вĕрентÿ тата çамрăксен политикин пайĕн начальникĕ Ю.Соколов анлă доклад турĕ. 2010 çул - Учитель çулталăкĕ пулнă май, Раççей, Республика, шайĕнче вĕсен ĕçне хавхалантарас тĕллевпе чылай ĕçсем туса ирттереççĕ. Пултаруллă вĕрентекенсем хăйсен профессиллĕ ăсталăхне тĕрлĕ конкурссенче туптаççĕ, грантсем çĕнсе илеççĕ. Хальхи вăхăтра районĕпе пурĕ 475 учитель ачасене пĕлÿ парассишĕн тăрăшать. Вĕсенчен 325-шĕ пĕтĕмĕшле пĕлÿ паракан шкулсенче ачасене пĕлÿллĕх тĕнчине явăçтарать. Çав шутран 48 учитель аслă категориллĕ , 234-шĕ пĕрремĕш категориллĕ. Шкул ачисем çеç мар, вĕрентекенсем те Патшалăхăн пĕрлехи экзаменне тытаççĕ. Кăçал çак тĕрĕслÿ витĕр 49 учитель тухнă. Вĕренекенсен пĕлÿ шайĕ экзаменра уççăн палăрать. 2009-2010 вĕренÿ çулĕсенче вĕренекенсем Патшалăхăн пĕрлехи экзаменне тытса лайăх результатсемпе палăрнă. «Хальхи шкулсенче информаципе коммуникаци инфратытăмне аталантармасăр май килмест. Паянхи куна илес пулсан районти 18 шкулта хальхи ыйтăва тивĕçтерекен 344 компьютер пур. Кашни вĕренÿ учрежденин хăйĕн сайчĕ, электронлă почта пур. Кăçал акă Intel «Пĕр вĕренекен - пĕр компьютер» республикăри проекта хутшăнса сертификат çĕнсе илтĕмĕр. Унпа килĕшÿллĕн пуçламăш классем валли ятарласа 25 нетбук килет. Çапла майпа шкулсенчи инфратытăма аталантарса ачасене пахалăхлă пĕлÿ парас тĕллеве пурнăçа кĕртетпĕр», - терĕ Ю.Соколов хăйĕн докладне пĕтĕмлетсе. Районти шкулсенчи вĕрентекенсем ун докладне сÿтсе яврĕç. Пултаруллă вĕрентекенсене райадминистрацин тата райадминистрацин вĕрентÿпе çамрăксен политикин пайĕн Хисеп грамотисемпе наградăларĕç.