24 августа 2010 г.
ЧР Министрсен Кабинечĕн Председателĕн çумĕн - Ял хуçалăх министрĕн М.Игнатьевăн ĕçлĕ çул çÿревĕ хальхинче Муркаш, Етĕрне тата Çĕрпÿ районĕсенче иртнĕ. Чи малтанах вăл «Çеçпĕл» Шупашкарти предприяти» акционерсен хупă обществинче пулса унăн продукцийĕпе паллашнă.
Муркаш район администрацийĕнче М.Игнатьев Муркаш Енĕн социаллă пурнăçĕпе экономика аталанăвĕн ыйтăвĕсемпе канашлу ирттернĕ. Тĕл пулура шăрăх çанталăк кÿнĕ тăкаксене саплаштарасси, çитес çулхи тыр-пул никĕсне хывасси, общество выльăх-чĕрлĕхне ăнăçлă хĕл каçарасси, çĕнĕ вĕренÿ çулне тивĕçлипе кĕтсе илесси тата малашлăх тĕллевĕсем çинчен сăмах пынă.
Унтан вăл Етĕрне тăрăхне çитнĕ, Советскинчи «Дары природы» ял хуçалăх кооперативĕн ĕç-хĕлĕпе паллашнă. Кунта çывăх вăхăтра пахча çимĕçрен сĕткенсемпе сиплĕ шыв кăларма палăртнă. Хальлĕхе цехсенче строительство пырать.
«Килĕшÿ» ял хуçалăх кооперативĕн ертÿçисенчен пĕри З.Воробьева пĕлтернĕ тăрăх, организацин пысăк тĕллевĕ - кунта кăларакан тавара чи малтан республикăра, унтан ытти регионта сутма палăртни. «Килĕшÿ» кооператив - «Дары природы» ял хуçалăх кооперативĕн тĕп партнерĕсенчен пĕри. М.Игнатьев çак проект пурнăçа кĕрессе Раççейри Ял хуçалăх министерствинче те кĕтнине палăртнă. Предприятин ертÿçисене пĕрремĕш çимĕçе декабрĕн 20-мĕшĕ тĕлне кăларма хушнă. Коллектив сăмаха ĕçпе çирĕплетме шантарнă. Çак ĕçе пурнăçлама пур услови пулĕ. Министр кунти лару-тăрупа кăмăллă юлнă.
«Рябинка» ял хуçалăх кооперативĕн ĕçĕ-хĕлĕпе кăсăкланнă май Михаил Васильевич халăхран пухакан сĕт хакне ÿстермелли майсене тишкерме сĕннĕ.