24 августа 2010 г.
Иртнĕ кунсенче ЧР Президенчĕ Н.Федоров педагогика ĕçченĕсене 2010 çулшăн çулленхи хавхалантару призĕсем тата Чăваш Енри вĕренÿ учрежденийĕсене грантсем панă.
Чăваш Ен Президенчĕн Н.Федоровăн 115-рп номерлĕ хушăвĕпе килĕшÿллĕн шкул çулне çитмен ачасен 17 учрежденийĕ, республикăри хушма пĕлÿ паракан 3 центр 200-шер пин тенкĕ грант çĕнсе илнĕ. Çак укçа-тенкĕ Чăваш Енри вĕренÿ системине аталантарма кайĕ. Вĕсенчен пĕри поселокри пĕрремĕш номерлĕ «Березка» ача сачĕ те асăннă гранта тивĕçнĕ.
Хăйсен професси ĕçĕнче çитĕнÿсем тунă чи лайăх учительсем, воспитательсем хутшăннă кунта. Вăрмарти Г.Е.Егоров ячĕллĕ пĕрремĕш вăтам шкулта информатика предметне вĕрентекен Светлана Николаевна Матросова вара çĕнтерÿçĕ пулса тăнă, пултаруллă та мал ĕмĕтлĕ учитель «Вĕрентÿ» наци проекчĕпе килĕшÿллĕн 200 пин тенкĕ çĕнсе илнĕ.
Асăннă шкул директорĕ Любовь Павловна Петрова палăртнă тăрăх, Раççейри Intel «Путь к успеху» конкурса хутшăнса Вăрмарти Г.Е.Егоров ячĕллĕ пĕрремĕш вăтам шкул виççĕмĕш вырăн çĕнсе илнĕ. Çакăнта С.Матросова вĕрентекенĕн тÿпи те пур. Маттур та талантлă учитель 2005-мĕш çултанпа асăннă шкулта ачасене информатика предметне вĕрентет. Кĕске вăхăтрах вăл пысăк çитĕнÿсем турĕ.
«Пирĕн шкул «Вĕрентÿ» приорителă наци проектне ăнăçлă пурнăçласа пырать. Çĕнĕ вĕренÿ çулне хатĕрленсе эпир чылай ĕçсем туса ирттертĕмĕр. Шкул спортзалне, актовăй зала, медицина кабинетне çĕнетнĕ, шкул çивиттине юсанă. Çак ĕçсене пурнăçлама пурĕ 400 пин тенкĕ тăкакланă. Халĕ пирĕн шкул çĕнĕ вĕренÿ çулне хатĕр. 2010-2011 çулсенчи çĕнĕ вĕренÿ çулне пĕрремĕш класа 100 ытла çамрăк ăру килмелле. Унсăр пуçне 110 ача 10-мĕш класра пĕлÿ пухма тытăнĕ. Пĕтĕмĕшле илсен, 1040 вĕренекен йышăнма палăртатпăр. Intel «Пĕр вĕренекен: пĕр компьютер» республикăри проекта хутшăнса сертификат çĕнсе илтĕмĕр. Унпа килĕшÿллĕн çитес вăхăтра пуçламăш классем валли ятарласа 25 нетбук килмелле. Ачасене пахалăхлă пĕлÿ парас тĕллевпе кăçал компьютер класĕ валли 30 компьютер туянтăмăр. Пурлăхпа техника базине çулсерен вăйлатса пыратпăр. Пĕтĕмĕшле каласан шкул вĕрентÿ шайĕпе те, пурлăх никĕсĕ тĕлĕшĕпе те хула шкулĕсенчен кая ан пултăр тесе тăрăшатпăр», - терĕ Л.Петрова директор хăйсен ĕçĕ-хĕлне пĕтĕмлетсе. Эппин çак шкултан Тăван çĕршыва юрăхлă, тĕрлĕ ÿсĕмсем тума пултаракан анлă тавракурăмлă çамрăк ăру тухасса шанас килет.