20 августа 2010 г.
Июлĕн 26-мĕшĕнчен пуçласа августăн 15-мĕшĕччен ачасен сывлăхне çирĕплетекен «Романтика» лагерьте виççĕмĕш - юлашки смена - ĕçлерĕ. Шăрăхпа çыхăннă-ши е урăх сăлтавпа - çак сменăра ытти çулсенчипе танлаштарсан, ытларах ача - 80 - канчĕ. 6-10 çулхи ачасемпе Л.Ковалевская, В.Киселев, 10-12 çулхисемпе Д.Вакина, Е.Николаева, чи аслисемпе, 13-15 çула çитнисемпе, Т.Васильева, Н.Ширняева, М.Гасымов воспитательсем ĕçлерĕç. Тулли пурнăçпа иртрĕ канакансен пурнăçĕ. Çакă воспитательсем - вĕсем хушшинче паллă педагогсем те, аслă вĕрентÿ заведенийĕсен студенчĕсем те, колледжсенче вĕренекенсем те пулчĕç - ĕçе пĕлсе йĕркелерĕç. «Тĕнче - сан тавра» программăна пурнăçа кĕртсе ачасене тавралăх çине çĕнĕ куçпа пăхма хистерĕ.
Смена вăхăтĕнче ачасем хаваспах тĕрлĕ кружоксене çÿрерĕç. «Хаваслă сăрăсем» кружок (ăна Л.Ковалевская ертсе пычĕ) вара пурне те чунтан илĕртрĕ. «Савăнăçлă караоке» (ертÿçи Т.Гаврилова) ачасене тĕрлĕ юрăсем вĕренме хистерĕ. И.Ширняева ертсе пыракан ташăçăсен кружокĕ ачасене мĕн чухлĕ ташă вĕрентмерĕ-ши; М.Гасымов ертсе пыракан «Спорт» кружокра та пионербол, футбол, шашка, теннис вăййисене выляс ăсталăха туптарĕç ачасем. Воспитательсем, ачасем, çавăн пекех районти шалти ĕçсен пайĕн сотрудникĕсем те (вĕсем пирĕн тăнăçлăха сыхларĕç) пĕрле, пĕр-пĕрне ăнланнипе кану хаваслă иртрĕ.
Пĕтĕмĕшле каласан «Романтика» лагерь ачасене чăннипех те килĕшрĕ. «Сывă пул, лагерь, тепĕр çул та килĕпĕр», - терĕç кунта каннă ачасем. Вĕсем калани пурнăçлантăр, мĕншĕн тесен çулла сывлăх пухнисем вĕренÿре те тăрăшуллă пулнине пурнăç пĕрре кăна мар кăтартса панă. Ку çапла пулĕ те.