20 августа 2010 г.
Ачасем çуллахи кун уçă сывлăшра пулни, унăн илемлĕхне курма вĕренни, çут çанталăкăн тĕрлĕрен сассине уйăрса илме хăнăхни вĕсен сывлăхне татах та çирĕплетет, ăс-хакăлне пуянлатать. Çакна вара эпир, «Березка» ача садĕнче ĕçлекенсем, çирĕп пăхăнса пыратпăр. Ачасемпе ытларах уçă сывлăшра пулма тăрăшатпăр.Тĕрлĕрен мероприятисене те çуллахи кун ача сачĕн территоринчи ятарласа хатĕрленĕ вылямалли площадкăсенче ирттеретпĕр. Ачасемпе час-часах экскурсисенче пулса çут çанталăк вăрттăнлăхĕсемпе, тăван тавралăхăн илемлĕхĕпе паллаштаратпăр, тăван ен культурине вĕрентетпĕр. Тĕрлĕ ушкăнри ачасемпе пĕрле ĕçлеме малашлăх плансем туса хатĕрлесе унпа килĕшÿллĕн пулса пырать пур ĕç те. Ташă-юрă каçĕ, юмахри сăнарсемпе тĕл пулу, тĕрлĕрен вăйă-кулă - ачасен юратнă вăййисем. Иртнĕ уйăхра «Шыв патшин праçникĕ», «Шыв патши тухни» ятпа уяв иртрĕ. Унта В.Петровапа В.Малинкова воспитательницăсем ачасен кăмăлĕсене çĕклерĕç, тĕрлĕрен вăйăсене хутшăнтарчĕç. Август уйăхĕнче вара «Çуллахи кун пулнăран пире питĕ лайăх» темăпа савăнăçлă мероприяти иртрĕ. Ăна аслă тата садикрен шкула кайма хатĕрленекенсен ушкăнрисемпе воспитательницăсем ертсе пычĕç, хăйсем те тĕрлĕрен сăнарсене хутшăнчĕç, ачасемпе пуç ватмăш вăйăсем тата тĕрлĕрен конкурссем ирттерчĕç. Çуллахи кунсем иртсе пыраççĕ, çав вăхăтра ачасен сывлăхне çирĕплетсе, ăс-хакăлне аталантарса пымалла - ачасене савăнăç кÿмелле. В.Петрова, Н.Михайлова, В.Малинкова, М.Иванова, С.Левина воспитательницăсемпе И.Николаева музыкăна вĕрентекен хăйсен пултарулăхĕпе уйрăмах палăрса тăраççĕ. Тасалăхпа йĕркелĕхе тытса тăраканĕсем вара воспитательницăсемпе пĕрлех вĕсене пулăшаканĕсемпе поварсем, хуçалăх ĕçĕсене тытса пыракан, кĕпе çăвакан мастерсем, рабочи-сантехник. Кĕскен каласан кунта вăй хуракансем пулас ăру калчисене тĕрĕс-тĕкел пăхса çитĕнтерес тесе тăрăшаççĕ.