20 августа 2010 г.
Чĕкету ялĕ район центрĕнчен пĕр 10-12 километрта вырнаçнă. Малтанхи вăхăтра ку яла асфальтлă çул та пулман, халĕ вара яла газ та çитнĕ. Çулĕ те ял хĕррине çитет. Çав вăхăтрах клуб тĕппипех çухалнă, ялти лавкка хупăннă. Халĕ вара начарри пирки çырмăпăр, паян кунта - пысăк уяв. Хальхи вăхăтра ялта 70 çын пурăнать. Вĕсенчен ытларах пайĕ - аслăрах çулхисем. Çуллахи кун çак йыш вара кăштах хутшăнать, хуланалла тухса кайнисене тăван ял хăй патне йыхравлать, ача-пăча сасси урама илем кÿрет.
Августăн 14-мĕшĕнче çак ялта пысăк уяв - ял уявĕ пулчĕ. Ăна йĕркелекенĕ çак ялта ÿссе çитĕннĕ, халĕ Шупашкар хулинче пурăнакан Мария Петровна Пашнина (Волоснова). Ялти пуçламăш шкултан вĕренсе тухсан ытти ачасемпе пĕрле ирхине ирех Пинерти, Пысăк Енккассинчи шкулсене васканă, унтан университетра ăс пухнă. Кунпа кăна çырлахман çамрăк хĕр, Мускаври апат-çимĕç промышленноç институтĕнче те вĕреннĕ. Кашни ачан хăйĕн шăпи тенĕ пек, унăн та çаплах пулнă ĕнтĕ. Тăван çĕртен аякра ĕçлесе пурăннă пулин те, тăванлăх туйăмĕ çухалман, хăй патнех туртнă. Çуралнă вырăн вара ăна темле урăхларах туйăмпа туртнă пулмалла. Мĕн ачаранпах унăн çуралнă вырăншăн мĕн те пулин лайăххи, ĕмĕр асра юлмалли тăвас килнĕ.
Акă паян çак кун çитрĕ темелле. Вăл тăрăшнипе Чĕкету ялĕ çумĕнчи масарта вилнисене асăнса хуть те хăш вăхăтра та çурта пырса лартмалли вырăн - часавай уçрĕç. Ĕлĕкрех ку масара Чĕкетÿ ялĕсĕр пуçне Вăтакас, Çитмĕш, Пинер, Кĕлкеш ялĕнчи çынсене пытарнă. Халĕ кунта вырăн-вырăнпа вилĕ тăприн мăкрисем çĕрпе шайлашнă, кам ăçта выртнине те пĕлме çук. Çапла вара Мария Петровна ĕлĕкхи ăру çыннисене манăçа кăларас мар тесе ырă ĕç турĕ. Çапла туни яла пĕтме паманни пирки çирĕплетсех каларĕç çак савăнăçлă саманта хутшăннисем. Часавая çветит тума Шупашкарти духовнăй училищĕн ректорĕ Михаил Иванов протоиерей килнĕ. Район администрацийĕн пуçлăхĕ К.Никитин тата ЧР Патшалăх Канашĕн председателĕн заместителĕ Г.Васильев пухăннă халăх умĕнче çак пысăк ĕçшĕн тав турĕç, вилнисене хисеп туни православи культурипе тĕнне тытса пыма пулăшнине палăртрĕç. Ку мероприятие Чĕкету халăхĕсĕр пуçне таврари ялсенчен те йышлăн пухăннă. Пурте çак ĕçе пуçарнă Мария Петровнăна тав турĕç, хăшĕсен куçĕнчен куççулĕ те тухрĕ. Тен вĕсен ашшĕ-амăшĕсем, тăванĕ-пĕлĕшĕсем çакăнта выртаççĕ пулĕ. Паян вара тахçантанпа килмен вырăнта пулма май килчĕ-çке-ха. Часавая чаплă лару-тăрура уçнă хыççăн та чылайччен тăчĕç пухăннисем. Çак мероприятипе пĕрлех ял уявне уявлама палăртнă ял çыннисем. Каярахпа икĕ уяв пĕрле пĕрлешсе чылайччен тăсăлчĕ ял варринчи улăхра.
Халăха татах та савăнăç кÿме Шупашкартан малтан «Янташ» ушкăнра пулнă, халĕ «Азамат» артисчĕсене ятарласа чĕнсе илнĕ. Вĕсем вара хăйсен пултарулăхĕпе пĕтĕм халăх кăмăлне çĕклентерчĕç, ташă-юрă пуçлама хавхалантарчĕç. Уява хисеплесе килнĕ хаклă хăнасем тата Кĕлкеш ял тăрăхĕн пуçлăхĕ В.Данилов, район депутачĕсен Пухăвĕн депутачĕ Ю.Данилов, çак уява пуçарса яраканĕ М.Пашнина пухăннă халăха уяв ячĕпе ăшшăн саламларĕç, ырлăх-сывлăх сунчĕç, пĕчĕк ялăн малашлăхĕ пулассине палăртрĕç, ку енĕпе Раççей тата Республика шайĕнче ĕçлекен тĕрлĕ программăсем те пулăшу кÿреççĕ. Ялти ятлă-сумлă çынсене - А.Волоснова, В.Алексеева тата ыттисене те аса илчĕç, пархатарлă ĕçсемшĕн тав турĕç. Çак уява хатĕрлеме пулăшнă, тĕрлĕ ĕçре активлă пулнă ял çыннисене - Ю.Иванова, Ю.Димитриева, В.Димитриева, С.Маркова ял тăрăхĕн пуçлăхĕ В.Данилов Хисеп грамотисем пачĕ. Йĕркелÿ комитечĕ вара ялта ырă ĕçсемпе палăрнисене хаклă парнесем парса хавхалантарчĕç. Ялти чи çамрăк ачапа ватти тата чи юратуллă çемье те пĕчĕк парнесене тивĕçрĕç. Пĕчĕк ялăн пысăк уявĕнче спорт мероприятийĕсемпе ташă-юрă чылайччен тăсăлчĕç.