20 августа 2010 г.
Пирĕн районта 7 ача сачĕ ĕçлет, вĕсенче 1029 çамрăк шăпăрлан пĕлÿ тĕнчине пĕрремĕш утăм тăвать (пĕр çултан пуçласа 6 çул таран), çакă шкул çулне çитмен ачасемпе илес пулсан 70 процентпа танлашать. Пĕтĕмĕшле пĕлÿ паракан 18 учрежденинче пурĕ 2855 ача пĕлÿ илет. Район администрацийĕн пуçлăхĕн 2010 çулхи майăн 31-мĕшĕнчи йышăнăвĕпе килĕшÿллĕн июлĕн 5-9-мĕшĕсенчен вĕренÿ учрежденийĕсем çĕнĕ вĕренÿ çулне хатĕррине тĕрĕсленĕ. Вĕренÿ учрежденийĕсем Роспотребнадзор тата патшалăх пушар надзорĕн асăрхаттарăвĕсене пурнăçланă.
Ача сачĕсенче вĕренÿпе воспитани шайне ÿстерес тĕлĕшпе чылай ĕçсем туса ирттереççĕ. Вĕсенче çамрăк ăрăва аталантармашкăн пур условисемпе туса параççĕ. Районти кашни ача садĕнче юсав ĕçĕсем пурнăçланă, пурлăхпа техника базине те пуянлатнă. 7 ача садĕнчен поселокри «Зоренька», «Березка» çĕнĕ вĕренÿ çулне лайăх хатĕрленнĕ.
Районти пур шкулсене те комисси йышăннă, вĕсем çĕнĕ вĕренÿ çулне хатĕр. Кашни шкулта юсав ĕçĕсем пурнăçланă. Чупайĕнчи, Тикашри пĕтĕмĕшле пĕлÿ паракан тĕп вĕренÿ учрежденийĕсенче капиталлă юсав ĕçĕсем тунă, Чулкасри, Кĕлкешри пĕтĕмĕшле пĕлÿ паракан тĕп вĕренÿ учрежденийĕсенче канализаци системин пăрăхĕсене улăштарнă.
Çавăн пекех Кĕтеснерти, Чулкасри, Кивĕ Вăрмарти шкулсенче шыв пăрăхĕсене улăштарнă. Вăрмарти Г.Е.Егоров ячĕллĕ пĕрремĕш, Мăнçырмари вăтам шкулсенче ăшă пăрăхĕсем кĕртнĕ. Шăхальти шкулта электричество проводисене çĕнетнĕ.
Вĕренÿ учрежденийĕсенчен чылайăшĕнче столовăйсене, спортзалне çĕнĕ сăн кĕртнĕ. Хальхи вăхăтра Чупайĕнчи пĕтĕмĕшле пĕлÿ паракан тĕп шкула модернизацилес ĕç пырать. Кунта пластикаран тунă чÿречесем лартнă, коридорти урайне улăштарнă, ытти чылай юсав ĕçĕсем тунă.