20 августа 2010 г.
Шкул коллективĕ ачасен вĕренÿ пахалăхне лайăхлатассипе чылай ĕçсем туса ирттерет. Кунта 18 вĕрентекен (вĕсенчен пĕрремĕш категориллĕ учитель - 5), 2 воспитатель тăрăшса вăй хураççĕ. Биологипе хими предмечĕсене вĕрентекен Л.Сапаркина районта иртнĕ «Çулталăк учителĕ» конкурсра лауреат ятне тивĕçнĕ. Çавăн пекех вырăс чĕлхипе литературине вĕрентекен Н.Ефремова та асăннă конкурсра лауреат пулнă. Физкультура учителĕ А.Петров çамрăк ăрăва патриотизмла воспитани парассипе тимлет. Çулсеренех вăл вĕрентекен ачасем районта иртекен «Зарница» вăййине активлă хутшăнаççĕ, малти вырăнсене йышăнаççĕ. Ача садне пурĕ 22 ача çÿрет. Иртнĕ вĕренÿ çулĕнче асăннă шкулта 117 ача вĕреннĕ. Вĕсенчен 12-шĕ отличник, 48 процент ударник шутланаççĕ. Пултаруллă ачасемпе çине тăрса ĕçлени - шкулсен инноваци программисене тата педагогсене пулăшмалли тытăмăн пысăк пĕлтерĕшлĕ енĕ. Иртнĕ çул тата кăçал тĕрлĕ шайри ăс-хакăл тупăшăвĕсене Пинерти пĕтĕмĕшле пĕлÿ паракан тĕп шкултан 26 ача хутшăннă, лайăх результатсем кăтартнă.
Республикăра иртнĕ «Эткер» наукăпа практика конференцийĕнче -пĕрремĕш тата биологи предмечĕпе иртнĕ олимпиадăра 8-мĕш класра вĕренекен Алина Иванова виççĕмĕш вырăн çĕнсе илнĕ.
Районта пулса иртекен тĕрлĕ олимпиадăсемпе конкурссене кунта вĕренекенсем активлăн хутшăнаççĕ. Акă «Наркотик вырăнне - спорт» плакатсен конкурсĕнче О.Петрова иккĕмĕш, «Вăрçă кашнин асĕнчех» конкурсра виççĕмĕш вырăна тухнă. Экологи темипе иртнĕ конференцинче вара Алина Иванова пĕрремĕш вырăна тивĕçнĕ. Пултаруллă та маттур А.Иванова кашни çулах шкул чысне район, республика шайĕнче хÿтĕлет, лайăх кăтартусемпе палăрса тăрать. Шкулта та пиллĕк паллăсемпе кăна вĕренет. Вĕренÿпе пĕрлех тĕрлĕ кружоксенче те пысăк тăрăшулăх кăтартать.
Кружоксем тенĕрен, кунта 9 тĕрлĕ кружок ĕçлет. Унта çĕр ытла ача хутшăнать, тĕрлĕ енлĕн аталанать.