20 августа 2010 г.
Физкультурăпа тата спортпа хавхаланни, спорт ăмăртăвĕсене хутшăнни ачасен сывлăхне çирĕплетет. Çак шкултан 1968 çулта вĕренсе тухнă тĕнче класлă спорт мастерĕн В.Соколовăн ятне çÿллĕ шайра тытаççĕ, çавна май курăмлă кăтартусем тăваççĕ. Вĕсенчен пĕри - спорт мастер кандидачĕ Руслан Боредский. Республикăра çăмăл атлетикăпа, велосипедпа чупассипе иртекен ăмăртусенче яланах малта. Р.Боредский Шупашкарти Олимп резервĕсен училищинче пĕлÿ пухнă. Çав вăхăтрах вăл шоссе çинче велосипедпа чупас енĕпе Раççей спорт мастерĕн кандидачĕ, ЧР тата Атăлçи Федераци тăрăхĕн велосипедпа чупакансен пĕрлештернĕ командин членĕ. 2010 çулта Руслан ЧР Президенчĕн Н.Федоровăн çулсерен паракан стипендине тивĕçнĕ. Пултаруллă спортсмен чăннипех сумлă хаклава тивĕçлĕ. Халĕ Р.Боредский Санкт-Петербург хулинчи «Олимпийская надежда» ятлă спорт шкулĕнче пĕлÿ пухать. Çăмăл атлетика енĕпе районта, республикăра М.Федотов, О.Филиппова, К.Семенова вĕренекенсем çулсеренех малти вырăнсене йышăнаççĕ. Йĕлтĕрпе чупассипе вара И.Ильин лайăх кăтартусемпе савăнтарать.