17 августа 2010 г.
- Çынсене илемпе савăнтарса, хăвна лайăх кăмăл кÿр - çакăн пек девизпа 5-мĕш çул Вăрмарти тĕп библиотекăра «Чечексен фантазийĕ» клуб ĕçлет. Унта тĕрлĕ çĕрте ĕçлекенсем, пенсионерсем, кил хуçи хĕрарăмĕсем пур кăмăлтан çÿреççĕ. Икĕ уйăхра пĕрре пухăнса клуб членĕсем ятарлă кĕнекесемпе, хаçат-журналсемпе, пĕр-пĕрин опычĕпе паллашаççĕ. Çеçкесене çитĕнтерекенсем чечек ăстисем патĕнче килĕсенче пулаççĕ. Нумаях пулмасть чечек ăстисен клубĕн черетлĕ ларăвне пуçтарăнчĕç. Малтанах тĕп библиотекăра вулакансемпе ĕçлекен уйрăм хатерленĕ. Пухăннисем «Чечексен тĕнчи» кĕнекесен куравĕпе паллашрĕç. Ятарласа çак темăпа илсе тăракан «Чечексем», «Килти чечексем», «Манăн юратнă чечексем», «Чечексем тавра», «Чечексен планети» журналсен çĕнĕ номерĕсене тишкересе тухрĕç. Ун хыççăн поселокра пурăнакан Ю.Петрова патне çул тытрĕç. Илемлĕ те тирпейлĕ çурт патне çитсенех пÿрт умĕнчи пахчаран тĕрлĕ тĕслĕ лилисен ырă шăрши сарăлать. Пахчара вара нумай тĕрлĕ георгинсем, пион, глематиз, роза, нумай çул ÿсекен тата вăрăран акнă чечексем çитĕнеççĕ. Хĕвелтен те ир вăранать теççĕ халăхра çакăн пек ĕçчен çынсене. Кашни кун ирхине 4 сехетре тăрса çумлать, шăварать, апатлантарать те юратнă тусĕсене хуçи. Хапха çумĕнчи пĕчĕк алăка уçса кĕрсен хăвна асамлăх тĕнчине лекнĕн туятăн. Кунта ятарласа тунă çÿлĕксем çинчен петуни, виола, лобели чечекĕсем усăнаççĕ. Хÿмесен çумĕпе çипсем тăрăх ипомея, фасоль, виноград çÿлелле кармашаççĕ. Ю.Петрова çулсерен пахча çимĕç, чечексен çĕнĕ сорчĕсене лартать. Вĕсене вăл ытларах почта урлă çырăнса илет. Нумай пахча çимĕç, чечек калчисем хатĕрлесе тăванĕсене, тус-юлташĕсене парнелет. Юлия Ивановна хăйĕн юратнă учительне 3. Мадяновăна кашни уяврах чечек çыххипе савăнтарать.
Халăхра çапла калани пур: чечек ÿстерекен хăйне те, ыттисене те савăнăç кÿрет.