17 августа 2010 г.
Вăрмарти Г.Е.Егоров ячĕллĕ пĕрремĕш ватам шкулта пурнăç хÿтĕлевĕн никĕсне В.Антонов учитель 2004 çулта вĕрентме тытăннă хыççăн кунтан вĕренсе тухнă 16 çамрăк çĕршыва хÿтĕлекен (офицер) профессине суйласа илнĕ. Çак кунсенче тăван шкулта «Зарница» тата «Орленок» вăйăна хутшăннă аслă класра вĕренекенсемпе Санкт-Петербургри космос академийĕн курсанчĕ А.Московкин, Новочеркасск хулинчи М.Буденный ячĕллĕ çар çыхăнăвĕн училищинчи Д.Кудряшов, Екатеринбург хулинчи Уралти МЧС институчĕн курсанчĕ А.Сотников (пурте 3-мĕш курса куçнă) тĕл пулу ирттернĕ.
Çар тивĕçне пурнăçланă чухне тухса тăракан условисем çинчен каласа панă. Офицер пулас текенĕн чи малтан вĕренÿре малта пымалла, спортпа туслă пулмалла. Çакна палăртма кăмăллă - Аслă Çĕнтерĕве 65 çул çитнĕ ятпа Мускавра ирттернĕ парадра пирĕн икĕ ентеш хутшăннă - Санкт-Петербургри космос академийĕн студенчĕ А.Московкин тата вăрçă ветеранĕ - Д.Егоров. Александр çак парада хутшăннăшăн медале те тивĕçнĕ. Çав вăхăтрах хисеплĕ караулта пирĕн ентеш - РФ Президенчĕн полкĕнче службăра тăракан А.Лисицын - хăйĕн çар тивĕçне пурнăçланă. Августăн 12-мĕшĕнче ентеш-курсантсем асăннă полкра тăракан Александрпа тĕл пулнă. Шел пулин те, çар реформи иртнĕ май, кăçал Чăваш Республикин çар ĕç комиссариачĕн Вăрмар тата Куславкка районĕсен пайне çар училищисенчен пĕр йыхрав та килмен. Çапла вара Г.Е.Егоров ячĕллĕ пĕрремĕш вăтам шкула пĕтернĕ, икĕ çул хушши пурнăç хăрушсăрлăхĕн никĕсĕ енĕпе Раççейре ирттернĕ Олимпиадра 2-мĕш вырăн йышăннă М.Егоров çар училищине каяймарĕ. Анчах пурте пĕлетпĕр - шанчăка çухатманнисем телейлĕ.