17 августа 2010 г.
Райадминистрацин ял хуçалăхĕпе экологи тата çĕрпе пурлăх пайĕнчи оперативлă даннăйсем тăрăх августăн 13-мĕшĕ тĕлне районти хуçалăхсем пурĕ 5840 килограмм сĕт туса илнĕ, патшалăха 5140 килограмм сутнă, таварлăхĕ 88 процент. Пĕр ĕне пуçне вăтамран талăкра 9,1 килограмм сăваççĕ. Сĕт сăвассипе «Шигали» хуçалăх малтисен ретĕнче, вĕсем сăвакан пĕр ĕне пуçне шутласан - 12,9 килограмм.
Сĕт - ял халăхĕн тупăш çăл куçĕ. Ялта пурăнакан кашни кил хуçи икшер е виçшер сăвакан ĕнене ахальтен тытмастех ĕнтĕ. Ĕне тытаканăн канăçĕ çукрах пулин те, укçи кĕрсен, ĕçленине йывăра хумасть çĕр ĕçченĕ.
Ирхи шуçăмпа вăранса, каçхи сĕмпе ыйăха путать Мăнçырма ялĕнче пурăнакан Римма Ивановна Дмитриева. Вăл - пенсионерка, тăватă çул ытла ĕнтĕ халăхран сĕт пуçтарать. Унччен малтан райпо системинче, ялти ĕне фермин заведующийĕнче вăй хунăскер, паянхи кун та - ĕç умĕнче. Сăмах май каласан, мăшăрне Венямин Павловича та вăл ĕçрех тĕл пулнă. Вĕсен виçĕ ача, пурте пурнăç çулĕ çине тухнă, икĕ мăнукĕ чĕвĕл-чĕвĕл сассипе савăнтарать. Паянхи савăнăçа мăшăрĕ Римма Ивановнапа пайлаймарĕ, шел пулин те, вăхăтсăр çĕре кĕнĕ. Ĕçре пусарать вăл кăмăлне. Хăйĕн те хуçалăхра выльăх-чĕрлĕх нумай. «Кунне 700-800 - шер литр сĕт пуçтарăнать. Хăш-пĕр кунсенче ытларах та. Пĕр литр сĕтшĕн паянхи куна 12 тенкĕ тÿлеççĕ. Сĕтне вара А.Казаков предприниматель килсе илсе каять. Укçине те питĕ йĕркеллĕ, эрнере пĕрре, тÿлесех тăрать. Ун патĕнче ĕçленĕшĕн пĕрре те ÿкĕнместĕп. Пенсионерка тесе нимĕнрен те уйăрмасть. Кашни уявсенчех укçан е тĕрлĕрен хаклă япаласем парса хавхалантарать. Япалишĕн мар, çынран уйăрса хăварманшăн савăнатăп», - тет ĕçрен ÿркенмен Римма Ивановна.
Паянхи куна Мăнçырма ял тăрăхĕнче 204 пуç сăвакан ĕне шутланать. Çак йыша вара кунта тĕрĕс-тĕкел хĕл каçарас тесе тăрăшаççĕ. Вĕсем валли апат хатĕрлессипе В.Павлов фермер та ял халăхне пулăшать, вырса илнĕ утă-улăма йÿнĕрех хакпа валеçет. Алла-аллăн тытăнса, пĕр-пĕрне пулăшса ĕçлеççĕ Мăнçырмасем. Апла пулсан выльăх йышне чакармаççех.