13 августа 2010 г.
Районти шалти ĕçсен пайĕн сотрудникĕ Ю.Григорьев çинчен таврара ырă ят çÿрет. Республикăра кăна мар, çĕршывра та лайăх пĕлеççĕ ăна. Тăхăр çул каялла Шăхаль шкулĕнче сетакан стилĕпе карате-до секцийĕ йĕркелени, унăн воспитанникĕсем çĕршывĕпех чапа тухни çĕклет те ун чыс-сумне. Çавăнпа ĕнтĕ унăн опычĕпе паллашма журналистсем таçтан та килсе çÿреççĕ. Тинтерех кăна-ха хăнара Мускав хăни, РФ Шалти ĕçсен министерстви кăларса тăракан «Щит и меч» журналăн пай редакторĕн заместителĕ О.Реброва пулнă. Журналист Юрий Иванович пултарулăхĕнчен, пуçарулăхĕнчен чăннипех те тĕлĕннĕ. Ара, вăл çине тăнипех карате енĕпе ирттернĕ республикăри ăмăртусенче унăн воспитанникĕсем 63 хутчен пĕрремĕш, 47-иккĕмĕш, 73 хутчен виççĕмĕш вырăнсене çĕнсе илнĕ-çке. Кăçал 9-мĕш класран вĕренсе тухнă Людмила Григорьевапа 5-мĕш класс пĕтернĕ Ксения Павлова Раççей карате федерацин пĕрлештернĕ командине кĕнĕ. Кăçал кĕркунне вĕсем Италире ирттерекен VII Тĕнче Кубокне хутшăнаççĕ. Эпир вара çамрăксене ăнăçусем сунатпăр.