13 августа 2010 г.
Кивĕ Вăрмарта çуралса ÿснĕ Игорь Николаевăн спортри кăтартăвĕсене пĕлсех каймастăмăрччĕ-ха. 2003-2004 çулсенче вăл бокс енĕпе чапа тухнă боксерăн О.Саитовăн призĕсене çĕнсе илессишĕн Санкт-Петербургра ирттенĕ турнирсенче çĕнтерсе чемпион ятне çĕнсе илнĕ, «Чи лайăх боксер» ята илме тивĕç пулнă. Унтанпа вăл ринга тухманччĕ. Халĕ пире тепĕр çĕнтерÿпе савăнтарчĕ.
Кăçалхи августăн 6-8-мĕшĕсенче Раççей профсоюзĕсен тĕп совечĕ çитĕнсе çитнисем хушшинче бокс енĕпе кĕрешсе мала тухассишĕн Шупашкарта чемпионат ирттернĕ. Çивĕч кĕрешÿре Вăрмар поселокĕнчи «Алмаз тĕпренчĕкĕсем» спорт клубăн воспитанникĕ И.Николаев боксер (малтанхи тренерĕ унăн ашшĕ Г.Николаев), Самар облаçĕнчен килнĕ Николай Чоморина парăнтарса виççĕмĕш вырăн йышăннă.
Халĕ вăл Мурманск хулинче пурăнать, Тинĕс лицейĕнче карап çинчи механик пулма вĕренет. Хăйĕн спортри ăсталăхне Раççей спорт мастерĕ, тава тивĕçлĕ тренерĕ, кикбоксинг енĕпе тăхăр хут тĕнче чемпионĕ ята тивĕçнĕ Алмаз Гисмеев патĕнче ÿстерет.