13 августа 2010 г.
Районти физкультурниксемпе спортсменсем хăйсен профессиллĕ уявне спортри кăтартăвĕсене лайăхлатнипе кĕтсе илеççĕ.
ЧР Президенчĕ Н.Федоров Чăваш Республикин Патшалăх Канашне янă Çырура çапла каланă йĕркесем пур: «Физкультурăпа тата спортпа хавхаланни, пахалăхлă аталану, çÿллĕ шайри культура тата пĕлÿлĕх, эрех-сăра ĕçĕссине, табак туртассине, наркотиксемпе айкашассине сивлени - чăннипех ăнăçуллă пултăр тетпĕр пулсан, акă мĕнле палăрса тăмалла пирĕн, Чăваш Енре пурăнакансен».
Çакă пире спорт çине пысăк тимлĕх уйăрма хистет. Халăх массăллă спортпа кăсăклантăр тесен мероприятисем ытларах ирттермелле. Çак ĕçе районти хула, ял тăрăхĕсенче пурăнакансем, предприятисемпе организацисенче вăй хуракансем, шкул ачисем активлă хутшăнаççĕ. Хĕллехи вăхăтра спортăн чи массăллă енĕ - йĕлтĕрпе чупасси. Кашни çулах йĕлтĕрпе чупса мала тухассишĕн Çĕнĕ Кинчерте Р.Петров, çуран чупассипе Чупайĕнче С.Линга, Пинерте Ю.Семенов, Шăхальте волейболла выляс енĕпе Ю.Петров воин-афганецсене, Энĕшпуçĕнче СССР спорт мастерĕсене пĕр тăван Ивановсене асăнса ăмăртусем йĕркелесси çирĕп йăлана кĕчĕ. Районти «Хĕрлĕ ялав» хаçат призĕсене çĕнсе илессишĕн йĕлтĕр эстафети те массăллăхпа палăрса тăрать. Шупашкарта иртнĕ «Раççей йĕлтĕр йĕрĕ-2010» чупăва пирĕн районтан нумаййăн хутшăнчĕç.
Хоккейла вылясси те вăй илсе пырать. Хĕллехи футбол вăййисене те кăмăллаççĕ Вăрмарсем.
Районти велосипедистсен пултарулăхне уйрăмах палăртмалла. ЧР тава тивĕçлĕ тренерĕ В.Сидоров тата П.Васильев, А.Саминов тренерсем тăрăшнипе вĕсем республикăра кăна мар, Раççей тата тĕнче шайĕнче ирттерекен ăмăртусенче те малтисен ретĕнче. Çăмăл атлетика, футболла, волейболла, шашка-шахматла вылясси, самбо, ирĕклĕ майпа кĕрешесси, шывра ишесси, карате енĕпе, кире пуканĕ йăтасси, армспорт физкультурăпа туслисем хушшинче анлăн сарăлнă.
Кăçал Патăрьелĕнче республикăри ял тăрăхĕсен командисем хушшинче ял вăййисенче мала тухассишĕн иртнĕ XV-мĕш ăмăртусенче пирĕн спортсменсем, чăннипех паттăрлăх кăтартрĕç. Волейболла выляссипе хĕрсен команди (капитанĕ В.Климова) виççĕмĕш вырăна тухрĕ. 3000 метра çуран чупассипе С.Антонов (Вăрмар поселокĕ) - пĕрремĕш, Е.Семенова (Çĕнĕ Кинчер) 2-мĕш вырăна тухнă, кире пуканĕ йăтассипе А.Андреева (Кĕтеснер), армспорт енĕпе хĕрарăмсем хушшинче Н.Эверскова (Кивĕ Вăрмар) - пĕрремĕш, Э.Макарова (Кавал) иккĕмĕш вырăнсене çĕнсе илчĕç. 100 килограмран йывăртараххисем хушшинче С.Павлов (Мăнçырма) виççĕмĕш пулчĕ. Чушкăлла выляссипе С.Архипов йĕркеленĕ Мăнçырма ялĕн команди пиллĕкмĕш вырăна тухрĕ. Механизаторсен конкурсĕ те интереслĕ иртрĕ. «Шигали» хуçалăхри М.Тапинов тата А.Ульянов механизаторсем тата Мăнçырма ял тăрăхĕнчи В.Левинпа В.Данилов виççĕмĕш вырăнсене çĕнсе илчĕç. Утă çулакансен команди - иккĕмĕш вырăнта. Район чысне В.Левин, А.Петров, И.Дмитриева хÿтĕлерĕç. И.Дмитриева (Кивĕ Вăрмар) нумай енлĕ ăмăртса виççĕмĕш вырăна тухма пултарчĕ. Баскетболла выляса улттăмĕш вырăна тивĕçнĕ. «Атте, анне тата эпĕ» конкурса хутшăнса О.Ивановсен çемйи ( Энĕшпуç) виççĕмĕш пулса тăчĕ. Çапла вара пĕтĕмĕшле итогсемпе пирĕн район команди республикăра лайăххисен шутĕнче, эпир пиллĕкмĕш вырăн йышăнма пултартăмăр. Патăрьелĕнчен кубоксемпе тата медальсемпе таврăнтăмăр.
Физкультурник кунĕ çывхарса килнĕ май, эпир хамăрăн ентешсемпе - чапа тухнă пултаруллă спортсменсемпе тивĕçлипе мухтанма пултаратпăр. XIX Олимп вăййисен чемпионĕ В.Соколов боксер XX Олимп вăййисене хутшăннă, Пĕтĕм тĕнчери Универсиада чемпионĕ Н.Пуклаков, XXVIII тата XXIX Олимп вăййисен участници С.Захарова, çăмăл атлетсем XXVII тата XXIX Олимп вăййисен участникĕ С.Иванов велосипедист, Пекинри XXIX Олимп вăййисене хутшăннă Т.Петрова çăмăл атлетпа В.Андреева велосипедист паянхи çамрăксемшĕн ырă тĕслĕх пулса тăраççĕ. Апла пулсан, пирĕн вĕсенчен вĕренмелли нумай.
Анчах пăшăрхантаракан тĕслĕхсем те çук мар-ха. Хăш-пĕр ял тăрăхĕсенче спорт инвентарĕ сахал, массăллă физкультурăна аталантарма укçи-тенкине те çителĕклĕ уйăрмаççĕ. Футбол командисем кашни ялтах пулмалла. Кĕçех урам командисем хушшинче ăмăрту йĕркелетпĕр.
Уяв ячĕпе физкультурниксемпе спортсменсене спортăн анлă çулĕ çинче ăнăçусем сунас килет.