10 августа 2010 г.
Паллă тавра пĕлÿçĕ, ăслă вĕрентÿçĕ Владимир Бурмистров пурнăçран кайиччен ĕмĕрĕ тăршшĕпе тĕпченĕ, шыранă темăсене пĕрлештерсе самаях сумлă кĕнекесем пичетлесе хăварчĕ, хăй хыççăн юлнă материалсем тата темиçе кĕнеке кăлармалăхах пур. «Наши земляки в борьбе с фашизмом» тĕрленчĕксен пуххинче Вăрмар çыннисем Тăван çĕршыва паттăррăн хÿтĕлени пирки çырнисем чылай.
Акă, Аслă Чак ялĕнчи Павел Антонов çинчен В.Бурмистров çапла хыпарлать: Павел Антонович Антонов, Аслă Чак ялĕнче çуралса ÿснĕскер, 201-мĕш парашютлă десант бригадин 4-мĕш батальонĕнчи 5-мĕш ротăри салтакĕ пулнă. Пĕррехинче Клетек районĕнче разведкăра чухне йывăр çапăçăва лекнĕ, тăшман атакисене темиçе хутчен те сирме тивнĕ унăн. Çавăн чухне вăл аманнă. Госпитальте сывалнă хыççăн тăван 39-мĕш гварди дивизин стрелковăй полкнех таврăнать. Сталинградри Трактор завочĕ çывăхĕнче, опыт тăвакан уйра çапăçать. Десантниксем тăшмана хирĕç вирлĕ кĕрешнĕ: вилнĕ, анчах каялла чакман. Павел Антонов та паттăррăн çапăçнă. Юнашар пулнă ентеш-юлташĕсем: Герман Журавлев, Зинон Степанов, Федор Белов, Алексей Самсонов çапăçура пуç хураççĕ. Алла-аллăн тытăçура Павел Антонов йывăр аманать, унăн комсомол билечĕ юнланса пĕтет. Каллех - госпиталь. Сывалнă хыççăн - стройра, Çĕнтерÿ пуличченех алăран хĕç-пăшал кайман. Виçĕ хутчен аманнă ентеш старшина пакунĕсемпе киле таврăнать.
Вăрçă хыççăнхи çулсенче Павел Антонович культура енĕпе тăрăшать, чылай вăхăт тăван ялти шкулта учительте ĕçлет. Фронта пĕрле тухса кайнă Иван Ивановпа (Чулкас) хурлăхлă та савăнăçлă тĕл пулусенче Сталинградри çапăçусенче пуç хунă тусĕсене аса илсе ĕмĕрхи салтаксен куçĕсем сахал мар шывланнă.