03 августа 2010 г.
«Çын ĕçпе илемлĕ» текен ваттисен сăмахĕ паянхи кун та пысăк пĕлтерĕшлĕ. Çакна Кавал çыхăну уйрăмĕнче почтальон пулса тăрăшса вăй хуракан Надежда Апполоновна Алексеева мĕн ачаран ăша хывса ÿснĕ.
Пĕтĕм Раççейри «Çулталăк почтальонĕ» конкурсра та вăл хăйĕн ĕçченлĕхĕпе, пултарулăхĕпе тĕлĕнтерчĕ. Асăннă конкурсра иккĕмĕш вырăн йышăнса Раççей шайĕнче хăйĕн ĕçĕнче чăн ăста пулса тăчĕ. Çак ятпа Н.Алексеевăна Вăрмар район администрацийĕн пуçлăхĕ К.Никитин, «Раççей почти» федераллă почта çыхăнăвĕн Чăваш Республикинчи Управленийĕн директорĕ С.Тимофеева, районти почта çыхăнăвĕн уйрăмĕн пуçлăхĕ С.Риманов саламларĕç, ĕçре пысăк ÿсĕмсем сунчĕç.
«Эпир Н.Алексеева пек пултаруллă та маттур ĕçченсем пуррипе чунтан савăнатпăр. Эсир ыттисемшĕн тĕслĕх пулса тăратăр. Çемьере те – юратнă мăшăр, анне. Ачасене тĕрĕс воспитани парассипе те тимлетĕр. Эппин почтальонсен династийĕ Кавал ялĕнче ăруран ăрăва куçса пырасса шанатпăр», - терĕ Светлана Терентьевна.
Вăрмар район администрацийĕн пуçлăхĕ К.Никитин пирĕн район çыннисем Раççей шайĕнче пысăк ÿсĕмсем тунипе чăннипех те мăнаçланмаллине палăртрĕ. «Надежда Апполоновна район, республика чысне çÿллĕ шайра хÿтĕлерĕ. Малашне те ĕçре ÿсĕмсем туса яланах малти вырăнсене тивĕçмелле пултăр. Ĕçрен хăраман ăста пулнă. Надежда Алексеева пирки те çакнах каламалла. Ялти почта çыхăнăвĕсĕр пуçне вăл шкулта та ачасене пахалăхлă пĕлÿ парассипе тăрăшать. Пĕтĕмĕшле каласан, пур енĕпе те маттур. Эпĕ ăна Раççей шайĕнче малти вырăна тухнă ятпа саламлатăп, телей, ăнăçусем сунатăп», - терĕ К.Никитин хăйĕн сăмахне пĕтĕмлетнĕ май.
Унтан Надежда Апполоновна сăмах илчĕ. Вăл Вăрмар район администрацийĕн пуçлăхне К.Никитина, С.Тимофеева директора конкурса хутшăнма пулăшнăшăн тав турĕ. «Эпĕ хамăн ĕçе чунтан юрататăп. Ĕç укçи пысăк мар пулин те, çынна усă кÿрес тесе тăрăшатăп. Пĕчĕк должноçра вăй хурса пысăк ÿсĕмсем тума пулнине курса ĕнентĕм», - тесе палăртрĕ Н.Алексеева почтальон.
Чаплă лару-тăрура Вăрмар район администрацийĕн пуçлăхĕ К.Никитин, «Раççей почти» федераллă почта çыхăнăвĕн Чăваш Республикинчи Управленийĕн директорĕ С.Тимофеева скутер парнелерĕç. Унсăр пуçне Хура тинĕс хĕррине канма кайма путевка та çĕнсе илнĕ Н.Алексеева. Эппин эпир пултаруллă почтальона лайăх кану, ăнăçу сунатпăр.