27 июля 2010 г.
Кăçалхи июлĕн 14-16-мĕшĕсенче Шупашкарти «Шупашкара 500 çул» паркра маунтинбайк енĕпе Раççей чемпионачĕ иртнĕ.
Пирĕн республикăн тĕп хулине килсе çитнĕ вăтăра яхăн регионти 252 велосипедистпа вĕсен тренерĕсене тата культурăпа кану паркне пухăннă çĕр-çĕр çынна спорт уявĕпе ЧР Физкультурăпа спорт тата туризм министрĕн заместителĕ С.Мельников, велосипед спорчĕн федерацийĕн вице-президенчĕ А.Капитонов ăшшăн саламланă.
– Пирĕн спортсменсемшĕн, манăн воспитанниксемшĕн ăмăртусем ăнăçлă иртрĕç. Чылайăшĕ вĕсенчен призерсен йышне кĕрсе медальсем çĕнсе илме тивĕçлĕ пулчĕç, - тулли кăмăлпа каласа парать ЧР тава тивĕçлĕ тренерĕ, Вăрмарти А.Федоров ячĕллĕ ачасемпе çамрăксен спорт шкулĕн аслă тренер-преподавателĕ В.Сидоров.
Пĕрремĕш кунне старта 1996-1997 çулсенче çуралнă арçын ачасем тухнă. В.Сидоров тренерăн воспитанникĕ, Кивĕ Вĕренер каччи Д.Яковлев çивĕч кĕрешÿре пĕр çаврăм дистанцие (5,5 км) иккĕмĕш вĕçленĕ. Пултаруллă спортсмен иртнĕ çул та Раççей кросĕнче виççĕмĕш пулнăччĕ.
Тренерăн тепĕр воспитанникне Р.Боредскин пултарулăхне уйрăмах палăртмалла. Пĕр кунта икĕ медаль çĕнсе илнĕ вăл. ЧР пĕрлештернĕ командинче пулса, 4х5,5 километрлă дистанцире иккĕмĕш вырăн йышăннă, кĕмĕл медаль çĕнсе илнĕ. Спорт мастерĕн нормативне пурнăçланă. Кăштах каннă хыççăн вăл 1994-1995 çулсенче çуралнисемпе 11 километрлă дистанцире тупăшнă, Санкт-Петербург хулинчен килнĕ спортсмена икĕ çеккунт выляса ярса иккĕмĕш вырăна тухнă.
1992-1993 çулсенчи ачасем хушшинче Мускаври Олимп резервĕсен училищинче вĕренекен Çиçтĕпе каччи Н.Чубуков (вăл та В.Сидоров тренерăн воспитанникĕ) 33 километрлă дистанцире чупса палăрнă, виççĕмш вырăн йышăннă, бронза медаль çĕнсе илнĕ, спорт мастерĕн нормативне пурнăçланă. Халĕ вăл Швейцари Кубокне çĕнсе илессишĕн ирттерекен ăмăртăва хутшăнма хатĕрленет. Çав ушкăнтах К.Питруков (Кĕтеснер) тупăшнă, вуннăмĕш вырăн йышăннă, Раççей спорт мастерĕн кандидачĕн нормативне тултарнă.
19-20 çулхи хĕрсем хушшинче Çĕнĕ Шулхан ялĕнче çуралса ÿснĕ Раççей спорт мастерĕ, Шупашкарти Олимп резервĕсен училищинче вĕренекен В.Андреева (малтанхи тренерĕ В.Семенов) 33 километрлă дистанцире пурне те çăмăллăнах çĕнтерсе ылтăн медаль çĕнсе илнĕ. Халĕ вăл кăçалхи августăн 30 -, сентябрĕн 5-мĕшĕсенче Канадăри Леонт-Сант–Анне хулинче ирттерекен Тĕнче чемпионатне хутшăнма хатĕрленет.
Çак ăмăртусене пирĕн тепĕр паллă спортсменка, Шупашкарта Олимп резервĕсен училищинче вĕренекен М.Семенова (Вăрмар поселокĕ) та хутшăннă. Вăл та медаль çĕнсе илес енĕпе шанчăк çуратнăччĕ, анчах та велосипедăн икĕ кустăрми те шăтни ăна ăмăртура çĕнтерÿ тума чăрмантарнă.