27 июля 2010 г.
Раççей почти кунне халалласа Мускав хулинче ирттернĕ «Çулталăк почтальонĕ» конкурсăн призерĕ. Конкурсра Кавалти çыхăну уйрăмĕнче почтальон пулса вăй хуракан пултаруллă та маттур Надежда Апполоновна Алексеева призер пулса тăнă. Раççейĕн тĕрлĕ кĕтесĕсенчен конкурса хутшăнма килнисем хушшинче вăл иккĕмĕш вырăна тухнă. Палăртма кăмăллă: Н.Алексеева иртнĕ çул республикăри конкурсра та çĕнтерÿçĕ ятне тивĕçнĕ пулнă. Кăçал Атăлçи федераци округĕнчен те вăл кăна хутшăннă.
Сăмах май каласан, Надежда Алексееван кашни кунĕ шутлă. Пĕтĕм хаçатсемпе çырусене пĕрле пухса вăл палăртнă урамсене валеçме тухать. 200 киле çитсе хаçат-журналпа тивĕçтермелле унăн. Тивĕçлĕ канăва тухнисемшĕн Надежда Алексеева чи çывăх çын темелле. Вĕсемпе пултаруллă почтальон ĕçлеме пуçланăранпах пĕр чĕлхе тупнă. Ялти кинемисемпе мучисем патне вăл яланах вăхăтра килет. Юратнă почтальона кĕтсе илме урамĕпех тухаççĕ, хăй тараватлă пулнăран килти кучченеçпе те сăйлаççĕ ăна. Н.Алексеева почтальоншăн та вĕсем чи çывăх çынсем. Электричествăпа çут çанталăк газĕшĕн укçа-тенкĕ тÿлемелле пулсан, вăл яланах ял çыннисен ыйтăвĕсене тивĕçтерме хатĕр. Кану кунĕсенче те Надежда хăйĕн юратнă ĕçĕнчен уйрăлмасть темелле. Вăл ял халăхĕ çырусем, хаçат-журнал чăтăмсăррăн кĕтнине лайăх ăнланать.
Хаçат-журнал валеçме Надежда мĕн ачаранах пуçланă. Унăн амăшĕ, каярахпа аслă аппăшĕ хăй вăхăтĕнче ялти почта уйрăмĕнче вăй хунă пулнă. И.Н.Ульянов ячĕллĕ Чăваш патшалăх университетне вĕренсе пĕтерсен, пултаруллă хĕр нумай шухăшласа тăмасăрах почтальон пулса ĕçлеме тытăннă. Ахальтен мар ĕнтĕ Надежда почтальон профессийĕ чун туртăмĕ тесе шутлать. «Эпĕ хамăн ĕçе питĕ юрататăп, çавăнпа та кунĕпех вăй хума хатĕр», - тет Н.Алексеева. Почтальон профессийĕсĕр пуçне Надежда Апполоновна ялти шкулта та ĕçлет, мăшăрĕпе карта тулли выльăх- чĕрлĕх тытаççĕ. Апла пулсан та, хăйĕн чун туртнă ĕçне вăл паянхи кунччен те тÿрĕ кăмăлпа пурнăçласа пырать. Çавăнпах ĕнтĕ пултаруллă почтальон Пĕтĕм Раççейри конкурсăн призерĕ пулса тăчĕ. Эпир вара ăна çак ятпа саламлатпăр, район чысне малашне те çÿллĕ шайра тытма сывлăх сунатпăр.