23 июля 2010 г.
Шкулта пултаруллă ачасем чылай. Вĕсем вĕренÿре, спортра, ĕçре те питĕ маттур. Вĕсенчен пĕри - саккăрмăш класс вĕренсе пĕтернĕ Светлана Михайлова. Вăл шкулта чи лайăх вĕренекен тесен те йăнăш пулмасть, мĕншĕн тесен унăн дневникĕнче яланах «5» паллăсем кăна. Унсăр пуçне пултаруллă хĕрача районти, республикăри ăс-хакăл тупăшăвĕсене активлă хутшăнать. Хутшăнать çеç мар, малти вырăнсене йышăнать. Акă иртнĕ çул республикăра иртнĕ «Шевле» конкурсра - иккĕмĕш, кăçал вара пĕрремĕш вырăнсене çĕнсе илнĕ. «Саккунпа йĕрке хуралĕнче» республикăри конкурсра та Света 2009 çулта - иккĕмĕш, 2010 çулта пĕрремĕш вырăна тивĕçрĕ. Пĕтĕм Раççейри «Русский медвежонок», районти «Кенгуру», «Чĕвĕлти чĕкеç» конкурссенче малти вырăнсене йышăннă. Пултаруллă хĕрача мĕн пĕчĕкрен сăрăсемпе ÿкерме юратать. Кам пĕлет, тен çакă Турă пани. Унăн ÿкерчĕкĕсене тăван шкулĕнчи вĕренекенсемпе вĕрентекенсем çеç мар, район, республика ачисем те курса савăнаççĕ. Республикăра иртнĕ «Хурасăр пуçне пĕтĕм сăрăсем» конкурсра та вăл пĕрремĕш вырăн çĕнсе илнĕ. Тăван çĕршывăн аслă вăрçинче çĕнтернĕренпе 65 çул çитнине халалласа С.Михайлова вĕренекен Кивĕ Вăрмар ял тăрăхĕнчи вăрçă участникĕсене вĕсен сăнĕсене ÿкерсе парнеленĕ.