23 июля 2010 г.
– Владимир Иванович хăйĕн ĕçне чунтан парăннă, тарăн пĕлÿллĕ, ачасемпе тата пĕрле ĕçлекенсемшĕн пысăк авторитетлă вĕрентекен,- хăйĕн шухăшĕсемпе паллаштарать технологипе черчени учителĕ Владимир Афанасьевич Егоров.
– Владимир Иванович хăйĕн профилĕпе çеç мар, пĕтĕм енĕпе эрудиципе паллă, темле йывăр ыйтăва та тĕрĕс хуравлама хатĕр, разведкăна кайма шанчăклă юлташ, - пĕлтереççĕ физкультурăна вĕрентекен Станислав Анатольевич Петровпа музыка учителĕ Вениамин Александрович Быков.
– Эпир Владимир Иванович урокĕсене тÿсĕмсĕр кĕтетпĕр, вăл темăсене тĕлĕнмелле интереслĕ, ăнланмалла, шухăша ямалла уçса парать, – хавхаланса хыпарлать 8 Б класа куçнă Таня Питерова. «Тĕрĕс, Владимир Иванович йывăр самантсенче яланах пирĕнпе пĕрле, ачасене ăнланса витĕмлĕ пулăшу парать», - Таня сăмахĕсемпе килĕшет Дима Васильев.
Кам çинчен-ха çак ырă сăмахсем; Калаçу Вăрмарти Г.Е.Егоров ячĕллĕ пĕрремĕш вăтам шкулти технологи, ИЗО тата МХК аслă категориллĕ вĕрентекенĕ Владимир Иванович Шапеев çинчен пырать.
Ача чухнех Владимир Ивановичăн ÿкерес тата ал ĕç тăвас енĕпе талант палăрать. Çавăнпах ĕнтĕ вăл 4-мĕш класран пуçласа пилĕк çул хушши Вăрмарти ÿнер шкулĕнче ЧР Культурăн тава тивĕçлĕ ĕçченĕ А. Васильев патĕнче ăсталăхне туптать.
1987 çулта Вăрмарти 2-мĕш вăтам шкула ăнăçлă пĕтерсен Владимир Иванович Шупашкарти И.Я.Яковлев ячĕллĕ Чăваш патшалăх педагогика институчĕн художествăпа графика факультетне вĕренме кĕрет. Учительсен династине малалла тăсса пырас шухăш та ертсе пырать ăна. Унăн кукамăшĕ Анна Андреевна Андреева хĕрĕх çула яхăн Тикаш шкулĕнче пуçламăш классенче вăй хунă. Ашшĕ те, Иван Кондратьевич Шапеев, малтан СХТ-ра трактористсен курсĕнче, каярахпа Кивĕ Вăрмарпа Арапуç шкулĕсенче, Кÿкеçри вĕренÿ-курс комплексĕнче преподаватель пулса тăрăшнă. Сăмах май каласан, Владимир Ивановичăн куккăшĕ Геннадий Германович та, тăванла пиччĕшĕ Валерий Витальевич Даниловпа унăн мăшăрĕ Галина Николаевна та пысăк стажлă педагогсем.
Пĕрремĕш курс пĕтернĕ хыççăн Владимир Ивановича çара илеççĕ. Çĕршыв умĕнчи тивĕçе пурнăçласа Волгоградри ПВО чаçĕнче планшетистран пуçласа отделени командирĕ таранччен çитет. Хăйне лайăх енчен кăтартса полкри «Чи лайăх планшетист» ята тата «Отличник боевого дежурства» знака çĕнсе çĕнсе илет. Волгоградри çар кунĕсем Владимир Ивановича уйрăмах çивĕч пăлхантарни ахальтен мар. Унăн кукашшĕ, Кондратий Егорович Шапеев, хаяр вăрçă çапăçăвĕсенче Сталинград çĕрне нимĕçсенчен паттăррăн хÿтĕленĕ. Кукашшĕ Сталинградпа Курск ункинчи хĕрÿ çапăçусем çинчен аса илсе каласа панисем яланлăхах чĕрере юлнă.
Салтакран килсен институтра вĕренÿ малалла тăсăлать. 1993-мĕш çулта учитель дипломне алла илсен В.Шапеев малтан Канашри пĕрремĕш шкулта, çав çулах Вăрмарти тăван иккĕмĕш вăтам шкулта ĕçе пуçăнать. Уроксене тимлĕн, пур енлĕн хатĕрленсе тĕрлĕ методикăсемпе анлăн усă курса ирттерет. Паянхи кун вăл информаципе технологи комплексĕпе туслă, Интернетра хăйĕн уйрăм сайт пур.
Владимир Иванович кашни çулах районта мастер-классем, стандартлă мар уçă уроксемпе семинарсем ирттерсе хăйĕн пуян педагогика опычĕпе ĕçтешĕсене паллаштарать. Унăн вĕрентÿ арсеналĕнчи чылай меслетсене урăх вĕрентекенсем ĕçре усă кураççĕ. Лайăх ĕçсен çитĕнĕвĕсем те юнашарах - 2006, 2010 çулсенче Владимир Иванович районти «Чĕрене ачасене паратăп» конкурс лауреачĕ, тĕрлĕ грамотăсемпе призсен хуçи. 2009 çулхи август уйăхĕнче Мускаври офицерсен юлташлăхĕ ăна «За активную и плодотворную работу по по военно-патриотическому воспитанию молодĕжи Чувашии» хисеп хучĕпе хавхалантарать. Хисеп хутне офицерсен «Сыны Отечества» юлташлăха ертсе пыраканĕ вице-адмирал В.Ильин алă пусса çирĕплетнĕ. Районти технологи олимпиадисенче Владимир Ивановичăн вĕренекенĕсем кашни çулах призлă вырăнсенче. 2008 çулта 11 «В» класри Алексей Савушкин районта технологи олимпиадинче 1-мĕш вырăн йышăннă хыççăн республикăра виççĕмĕш вырăн çĕнсе илет. Кăçал мартăн 18-мĕшĕнче иртнĕ туристсен ăмăртăвĕсенче Владимир Иванович хатĕрленĕ команда 1-мĕш вырăна тухать.
Тăрăшуллă вĕрентекен ирттерекен «Авиаци моделĕсем» кружокра ачасем яланах йышлă. Кружокра вĕсем тĕнчери ракета техникине, вăрçă тата хальхи вăхăтри самолетсемпе хĕç-пăшал макечĕсене ăсталаççĕ, хăйсен ĕçĕсене районта тата республикăри тĕрлĕ выставкăсенче кăтартаççĕ. 2008-мĕш çулта 5 «В» класри Костя Павлов республикăри «Юные техники в кадре» фотоконкурсра иккĕмĕш вырăна тухни те, çулсерен Çĕнĕ Шупашкарта иртекен республикăри «Воздушный змей» фестивальсенче В.Шапеев хатĕрленĕ командăсем ăнăçлă хутшăннисем те питĕ пысăк çитĕнÿ пулса тăрать.
Владимир Иванович пурнăçпа шай утакан, коммуникабельлĕ, хăйĕн тавра курăмне ялан аталантаракан учитель. Фото тата видео ĕçĕсемпе палăрса тăрать, шкул командишĕн волейболла вылять. 1998-мĕш çултанпа пĕр сиктермесĕр районта тата республикăра иртекен «Орленок», « Зарница» вăййисене хутшăнакан командăсене ертсе пыраканĕсенчен пĕри. «Зарницăра» пăшал перекен ăмăртусенче тĕп судья. Пĕр вăхăт хушши Владимир Иванович районти культура çуртĕнче дискотекăра диджей пулса ĕçлеме те вăхăт тупать. Çулла час-часах «Романтика» ача-пăча лагерĕнче вожатăй е пуçлăх çумĕ пулса ĕçлет. Вăл кирлĕ пулсан юрлама та ăста. Пĕлтĕр Аслă Çĕнтерÿ ячĕпе иртнĕ концертра юлташĕсемпе шăрантарнă «Эх, дороги» юрă çынсен куçĕсенчен куççуль те кăларнăччĕ.
Коридорта шăнкăрав сасси янăрать. Класа ачасем юратакан, хисеплекен вĕрентекен Владимир Иванович кĕрет. Урок пуçлама вăхăт. Эпир вара пултаруллă учителе малалла та ĕçре тата пурнăçра çĕнĕ пысăк çитĕнÿсем сунатпăр.