23 июля 2010 г.
Тикашри пĕтĕмĕшле пĕлÿ паракан тĕп шкулта вĕренекенсем хушшинче пур енчен те пултаруллă та активлă ачасем нумай. Вĕсенчен пĕри – 8-мĕш класа куçнă Алина Иванова. Туслă класра пурĕ те 7 ача кăна вĕренет. Вĕсенчен çурри ытла шкулта тата районта ирттерекен тĕрлĕ конкурссемпе мероприятисене кăмăлтан хутшăнать, Раççей шайĕнче тĕрлĕрен предметсемпе ирттерекен вăйă-конкурссене вара пурте хутшăнаççĕ.
Алина класа малалла туртакан тĕп шăнăр пулса тăрать. Вĕренÿре лайăх ĕлкĕрсе пыраканскер, вăл спортпа та питĕ туслă. Сывлăхне çирĕплетес тесе кулленех хăнăхтару занятийĕсем туни ăна спорт ăмăртăвĕсенче малти вырăна тухма пулăшать. Алинăн вĕренÿри тата тĕрлĕрен конкурссенчи çитĕнĕвĕсене кăтартаканни – портфолио папкине тултаракан грамотăсемпе дипломсем. Район шайĕнче Вĕрентекен çулталăкне халалласа тăван ен культурипе ирттернĕ наукăпа практика конференцийĕнче вăл 1-мĕш вырăн йышăннă. 2010 çул ЧР Патшалăх символĕсен кунне халалланă конкурсра 3-мĕш пулнă. Республика шайĕнче çулсерен ирттерекен «Букварьтен илемлĕ литературăна çити» конкурсра «Поэзи» номинацире 3-мĕш вырăн йышăнни Алина пултарулăхĕ пур енлĕ аталаннине çирĕплетет. Раççей шайĕнче ирттерекен «Русский медвежонок», «КИТ», «Золотое руно», «Британский бульдог», «Инфознайка», «Кенгуру», «Чĕвĕлти чĕкеç» конкурссене хутшăнса вăл тĕрлĕ предметпа пĕлĕвĕ мĕнле пулнине тĕрĕслет, çĕннине нумай пĕлет, тавра курăмне анлăлатать. 2010 çулта К.Иванов çурални 120 çул çитнине паллă турăмăр. Çак паллă куна халалласа шкулта, районта, республикăра тĕрлĕрен мероприятисемпе конкурссем нумай пулчĕç. Пултаруллă хĕр ача пур çĕре те хутшăнма ĕлкĕрчĕ, портфолио дипломсемпе, грамотăсемпе, сертификатсемпе пуянланчĕ.
Шупашкарти наци музейĕпе литература музейĕ Алинăн ĕçĕсене лайăх енчен палăртрĕç. Çак çитĕнÿсем вăр-вар та калаçма юратакан, пур енчен те малалла ăнтăлакан Алина кашни мероприятие, кашни конкурса, кашни ăмăртăва тĕплĕн хатĕрленнине кăтартаççĕ.