23 июля 2010 г.
«Çурхи пĕр кун çулталăк тăрантарать», - тенĕ мĕн авалтан. Кăçалхи çул вара çурхи кун çулталăк тăрантарасса шанма йывăртарах пулĕ, мĕншĕн тесен çуркунне акнă пĕрчĕллĕ тата пăрçа йышши культурăсем хăш-пĕр участоксенче пĕр шит çÿллĕш те ÿсеймен, çĕрĕ те çуркаланса пĕтнĕ, çĕр аннемĕрĕн шывшăн ăш çунать тейĕн.
Ку чăнахах та çапла, пур çĕрте те шыв ыйтăвĕ чи çивĕччи пулса тăчĕ. Кам маларах вăранса ĕлкĕрет, çав шывлă пулать, мĕншĕн çапла калатăп-ха. Ара, пурте харпăр хăй килĕсенче пахча çимĕç туса илес тĕллевпе колонкăсенчи шыва шлангсемпе юхтараççĕ. Чылайăшĕ ку ырлăхпа кунĕпех усă курма та хирĕç мар. Чылай çĕрте пĕвесем типсе пычĕç. Çак вăхăтпа усă курса харсăр фермерсем кÿлĕ тĕпне тулнă юшкăна тасатма васкаççĕ. Ку енĕпе «Г.Ямуков» хресчен (фермер) хуçалăхĕнче кар тăрса ĕçе тытăннă. Вĕсем вара пĕр харăсах икĕ куяна тытаççĕ темелле - кÿлĕре тапса тăракан çăл куçне те тасатаççĕ, юшкăнне уй-хире турттарса пахалăхлă удобрени вырăнне те усă кураççĕ. Кунсерен 4-5 техника ĕçлет кунта. Çыннисем те çав тери харсăр, лартнă çĕр улмине те кашни кунах ятарлă оборудовани туянса шăварсах тăраççĕ.Çĕр улмине вĕсем 260 гектар çинче лартнă, çав шутра 50-60 гектарĕ ир çитĕнекенни. Малти малах пултăр тенĕ пек ир пулакан çĕр улмине Кĕлкешсем тăтăшах шăварса тăраççĕ. Выльăх-чĕрлĕх валли хĕл каçма утă-улăмне те хатĕрлеççĕ, халăха та сутаççĕ, хуçалăхра ĕçлекенсене ăна вара йÿнĕрех хакпах тивĕçтереççĕ. Çĕр ĕçченĕ шăрăх çанталăк тесе сулхăнра выртмасть, кунне-çĕрне пĕлмесĕр ĕçлеме тăрăшать, мĕн çитĕннине пухса илме васкать. Республикăри кăнтăр районĕсенче иртнĕ эрнерех вырмана тухнине пĕлетпĕрх-ха. Çак кунсенче пирĕн районта та хĕрÿ ĕç вăхăчĕ пуçланчĕ темелле. «Урмарская» ăратлă кайăк-кĕшĕк фабрики, «Арабоси» агрофирма, «Вăтам Энĕш», «АгроВладина» хуçалăхсемпе «Г.Ямуков» хресчен (фермер) хуçалăхсем тырă пуссине тухрĕç. Хальхи вăхăтра уй-хир «хуçисен» ĕçĕ çав тери нумай. Çĕнĕ йышши комбайнсене те çĕнĕлле ĕçлеме хăнăхтармалла, мĕншĕн тесен вĕсем улăмне пĕр купана пуçтарса пымаççĕ, хăйсем хыççăн уй-хирте сапаласа хăвараççĕ. Выльăх апачĕ хĕсĕк вăхăтра çакă çухатупа танах пулĕ. Тухăçĕ халичченхи çулсемпе танлаштарсан палăрмаллах сахал пулсан та ĕçне пурпĕрех пурнăçламалла, йĕтемне те тирпейлемелле тата ытти те.