23 июля 2010 г.
Район администрацийĕнче Вăрмар район депутачĕсен Пухăвĕн депутачĕсемпе иртнĕ 55-мĕш ларăва район администрацийĕн пуçлăхĕ К.Никитин, район депутачĕсен Пухăвĕн председателĕ Г.Тимофеев, ЧР Президент администрацийĕн патшалăх влаçĕн органĕсемпе тата обществăлла пĕрлешĕвĕсемпе ĕçлекен пайĕн консультанчĕ Б.Краснов, район депутачĕсен Пухăвĕн депутачĕсем, хула, ял тăрăхĕсен пуçлăхĕсем, райадминистрацин пай начальникĕсемпе сектор заведующийĕсем хутшăннă, пурĕ 3 ыйту пăхса тухнă.
Кун йĕркинчи пĕрремĕш ыйтупа - «2011-2020 çулсенчи Вăрмар район çамрăкĕсем» районти тĕллевлĕ программăпа райадминистрацин пуçлăхĕн заместителĕ, райадминистрацин вĕрентÿпе çамрăксен политикин пайĕн начальникĕ Ю.Соколов тухса калаçрĕ. Вăл палăртнă тăрăх, асăннă программа 6 пайран тăрать. Кашнипе тĕплĕнрех паллаштарчĕ, тĕп задачисем çинче чарăнса тăчĕ. Çамрăксен политикине аталантарас тесен пултаруллă та ăста, çамрăк кадрсем кирлĕ. Юрий Васильевич палăртнă тăрăх, 6555 çын 14 çултан пуçласа 30 çула çитичченхисем шутланаççĕ. Вĕсенчен пĕтĕмĕшле пĕлÿ паракан учрежденисенче 920 ача вĕренет, 1782 çамрăк районти предприятисемпе организацисенче, хуçалăхсенче тăрăшса вăй хурать. «Малашлăхра ял тăрăхĕсенче çамрăксемпе ĕçлекен специалист пулмалла. Ку енĕпе ял тăрăхĕсен пуçлăхĕсен ĕçлемелле. Вăрмар район депутачĕсен Пухăвĕн депутачĕ пулма 30 çула çитмен çамрăксене те суйламалла. Пултаруллă та талантлă çамрăксем ытларах пулни районăн социаллă пурнăçпа экономикине аталантарма май парĕ, - терĕ Ю.Соколов.
Çавăн пекех Юрий Васильевич районта творчество енчен аталанакан, пултаруллă çамрăксене хавхалантарни, çулсеренех ЧР Президенчĕн Грантне тивĕçни çинчен те асăнса хăварчĕ. Иртнĕ çул пирĕн районта ăна 7 çамрăк илме тивĕç пулнă. Районти шкулсенче волонтер ушкăнĕсем активлă ĕçленине, КВН команди республикăра малтисен ретĕнче пулнине те палăртрĕ Ю.Соколов. Асăннă мероприятисене йĕркелеме укçа-тенкĕ сахал мар кирлĕ. Çавна май Ю.Соколов районти тĕллевлĕ программăна аталантармашкăн укçа-тенкĕ уйăрмаллине те каларĕ. Депутатсем пĕр сасăллă пулса «2011-2020 çулсенчи Вăрмар район çамрăкĕсем» районти тĕллевлĕ программăна йышăнчĕç.
Кун йĕркинчи иккĕмĕш ыйтупа райадминистрацин организаципе контроль ĕçĕсен пайĕн начальникĕ Н.Павлов тухса калаçрĕ. Депутатсем Вăрмар район депутачĕсен Пухăвĕн депутачĕсене суйламалли палăртнă куна çирĕплетрĕç.
2010 çулхи майăн 20-мĕшĕнчи 396 номерлĕ Вăрмар район депутачĕсен Пухăвĕн йышăнăвне пăрахăçланине палăртрĕç. Юлашкинчен район администрацийĕн пуçлăхĕ К.Никитин пĕтĕмлетсе сăмах каларĕ.