20 июля 2010 г.
Владимир Валерьевич Иванов 1983 çулхи апрелĕн 22-мĕшĕнче Энĕшпуç ялĕнче çуралнă. Ашшĕпе амăшĕ, Валентина Петровнăпа Валерий Петрович Ивановсем, предпринимательсем пулса тăрăшаççĕ, ятлă-сумлă, ĕçчен çемьене халăх хисеплет.
Вĕсем ывăлпа хĕр пăхса çитĕнтернĕ. Икĕ ачи те аслă пĕлÿ илнĕ.
Ывăлĕ ялти шкулта лайăх паллăсемпе вĕренсе тухать, уйрăмах ăна информатика предмечĕ килĕшет, компьютерпа кăсăкланать.Спортпа туслă пулнă май, районти çăмăл атлетикăпа иртекен ăмăртусенче сахал мар çĕнтерÿçĕ пулать, шкул чысне республикăри чупусенче те хÿтĕлет, «Орленок» çарпа спорт вăййисенче пултарулăх кăтартать. 2001 çулта ялти вăтам шкултан вĕренсе тухать. Çав çулах, тĕрĕс çул суйласа илсе, ĕмĕт-тĕллевĕсене пурнăçласа «çунатлă» çамрăк Чăваш патшалăх университечĕн экономика факультетне вĕренме кĕрет.
2005 çулта университетран ăнăçлă вĕренсе тухса алла диплом илет, унтах çар кафедринче вĕренсе «лейтенант» звание тивĕçет. В.Иванов пĕлÿ шайне татах ÿстерме шутлать, 2006 çулта аспирантурăра вĕренме пуçлать. Пултаруллă аспирант хăйĕн пурнăçне экономика наукисен тĕпчев ĕçĕсемпе çыхăнтарать. 2010 çулхи апрель уйăхĕнче 27 çулхи Владимир экономика наукисен кандидачĕн ученăй ятне илме тăратнă диссертацие ăнăçлă хÿтĕлет. Диссертаци теми: «Инвестирование аграрного производства как фактор воспроизводства капитала» ятлă пулнă. Унăн ĕçне экономика наукисен докторĕ Н.Тумаланов профессор ертсе пынă. Вăл хальхи вăхăтра ЧПУра предприятисен экономика кафедрин пуçлăхĕ. Владимир Валерьевич, ял хуçалăх проблемисене лайăх пĕлекенскер, хăйĕн диссертацийĕнче инженери инфратытăмĕн паркне тумаллине тата çĕнетмеллине, выльăх-чĕрлĕх ÿстерме инвестици проекчĕсене епле пурнăçламаллине тĕплĕн çутатса панă. Çамрăк ученăй çак темăпа çыхăннă 8 наука тата методика ĕçĕсем уйрăммăн çырса кăларнă. Вĕсем тĕрлĕ наука журналĕсенче пичетленсе тухнă. В.Иванов, университетра экономика факультечĕн преподавателĕ пулнă май, студентсемпе тачă çыхăну тытать, вĕсен кулленхи ыйтăвĕсене вăхăтра татса парать, экономика предмечĕн вăрттăнлăхĕсене уçса парассишĕн çине тăрса ĕçлет, тивĕçĕсене тÿрĕ кăмăлпа пурнăçлать. Студентсем унăн вĕрентĕвĕпе, пулăшăвĕпе кăмăллă.
Чăнласах вĕри чĕреллĕ çамрăк ученăй-ентеш ырă ята тивĕçлĕ. Çирĕп ăс-хакăллă, чăрмавсенчен хăрамасăр, сывă пурнăç йĕркине чыслăн пурнăçласа пурнăç сукмакĕпе талпăнса малалла утать. Пултаруллă спортсмен ЧПУ преподавателĕсем хушшинче çăмăл атлетикăпа иртекен ăмăртусенче те çитĕнÿсем тăвать.
Владимир Валерьевич хăйĕн юратнă мăшăрĕпе, Ольга Леонидовнăпа, Вячеслав ятлă ывăл пăхса çитĕнтереççĕ. Хисеплĕ В.Иванова ырлăх-сывлăх, вăрăм ĕмĕр сукмакĕпе малалла та çирĕппĕн утма пултарулăх, ăнăçупа çитĕнÿ сунатпăр, ĕмĕтленсе шутлани пурнăçа кĕрсех пытăр.
Энĕшпуç ялĕнчен паллă çынсем сахал мар тухнă, вĕсен ĕçне çамрăксем тăсса пыни савăнăç кÿрет. Ял чысне çÿлте тытса пыракансем малашне те пулĕç. Халĕ вара пирĕн пултаруллă çамрăксемпе савăнмалла.