Публикации » Инвалид хутне кĕнĕ

26 июня 2010 г.

Район прокуратури «Пĕтĕм Раççейри инвалидсен обществи» Чăваш Республикинчи обществăлла организацин Вăрмар районĕнчи организацийĕн председателĕпе Э.Борисовăпа пĕрле инвалидсен социаллă хÿтлĕх законодательствине еплерех пурнăçланине тĕрĕсленĕ. Вĕсем ЧР Сывлăх сыхлавĕн тата социаллă аталану министерствин «Вăрмарти халăха социаллă пулăшу паракан центр» республикăри патшалăх учрежденине тĕрĕсленĕ. Çак центрти ватăсемпе инвалидсен вăхăтлăх пурăнмалли уйрăмĕнче халĕ 30 çын пурăнать. Вĕсенчен 6-шĕ - инвалидсем. Тĕрĕслев вăхăтĕнче граждансен пурăнмалли условисене пăхнă, пулăшу кÿресси пирки вĕсемпе калаçусем ирттернĕ. Çавна май ватăсемпе инвалидсен пурăнмалли условисене кунта аван йĕркеленине палăртнă. Инвалидсем пурте хăйсене хăйсем пăхса тăрайраççĕ. Çапах та куç япăххипе пĕрремĕш ушкăнри инвалида тухнă З.Ивановăна туяпа, «калаçакан кĕнеке» вуламалли ятарлă тытăмпа, сасă кăларакан медицина термометрĕпе тивĕçтернĕ. Анчах та куллен усă курмалли медицина термометрĕ тата «калаçакан кĕнекесене» вуламалли хатĕрĕ те ĕçлемеççĕ. Ку хатĕрсене кинемей валли РФ Социаллă страховани фончĕн республикăри уйрăмĕ уйăрнă. Социаллă пулăшу центрĕнче ĕçлекенсен З.Иванова ятĕнчен çак органа хатĕрсем юсавсăрри çинчен заявлени çырса памалла пулнă. Хĕрарăмăн интересĕсене хÿтĕлеме «Вăрмарти халăха социаллă пулăшу паракан центр» республикăри патшалăх учрежденийĕ çак çитменлĕхсене пĕтерме, З.Ивановăн интересĕсене хÿтĕлеме район прокуратури суда исклă заявлени панă.