22 июня 2010 г.
Чăваш Енри тылра тăрăшнă ентешсен ĕçне пысăка хурса хакламалла. 120 пин ытла çынна «1941-1945 çулсенче Тăван çĕршывăн аслă вăрçи вăхăтĕнче хастар ĕçленĕшĕн» медальпе чысланă.
Вăрмар поселокĕнче пурăнакан Николай Егоровичпа Елена Романовна Чебослаевсем пирĕн тăрăхра хисеплĕ çынсем. Çĕршывăн наградисене те сахал мар тивĕçнĕ вĕсем. Аслă Çĕнтерĕве 65 çул çитнĕ ятпа вĕсене РФ Президенчĕ Д.Медведев, ЧР Президенчĕ Н.Федоров саламлă открыткăсем ярса панă. Халиччен те сахал мар пулнă наградăсем çумне вĕсем хутшăнни ветерансене чăннипех савăнтарать.
Çак сăпайлă мăшăрăн кун-çулĕ чăннипех те пархатарлă. Н.Чебослаев 1930 çулхи майăн 19-мĕшĕнче Куславкка районĕнчи Елчĕк ялĕнче çуралнă. Ялти шкулта 5 класс вĕренсе пĕтерсенех, 12 çулта, Чапаев ячĕпе хисепленекен колхозра лашапа суха тума пуçланă, тыр-пул çитĕнтерсе фронта пулăшма тăрăшнă. «Пĕтĕмпех фронт валли, пĕтĕмпех Çĕнтерÿ тума» - çакăн пек дивизпа вăй хунă ун чухне пур çĕрте те. 1949 çулччен колхозра ĕçленĕ. Унтан комсомол наборĕпе салтака каять, Польшăра тинĕс пехотинче службăра тăрать. 1954 çулта служба срокне татса яла таврăнать. Чашламари Елена Романовнăпа çемье çавăраççĕ. Тин кăна салтак тумне хывма ĕлкĕрнĕ, вăй-хал енчен çирĕпленсе таврăннă çамрăк икĕ çул чукун çул çинче стрелочникра тăрăшать. Вăрмара пурăнма куçса килсен Канашри автомотошкулăн Вăрмарти филиалĕнче вĕренсе шофер правине илет. Çавăн хыççăнах кунта инструкторта ĕçлеме пуçлать. 1968 çулчченех кунта тÿрĕ кăмăлпа вăй хурать. Ун хыççăн хăйĕн пурнăçне районти «Сельхозтехника» пĕрлешĕвĕпе çыхăнтарать. 1982 çулччен шофер-экспедиторта тăрăшулăх кăтартать. Ĕçленĕ вăхăтрах Вăрмарти çамрăк рабочисен шкулĕнчен вĕренсе тухать, вăтам пĕлÿ илет. Виçĕ çул хушши Вăрмарти иккĕмĕш вăтам шкулта ачасене автомашинăпа çÿреме вĕрентет.
1985 çулта Канашри автотранспорт предприятийĕн Вăрмарти филиалне автобуспа ĕçлеме кĕрет те мĕн пенсие тухичченех, 1997 çулччен, унта хăйĕн мĕн пур хастарлăхне парать. Кунта ĕçленĕ вăхăтра ăна - пĕрремĕш класлă водителе - «Аварисĕр ĕçленĕшĕн» пĕрремĕш, иккĕмĕш тата виççĕмĕш степеньлĕ знаксемпе наградăлаççĕ. 1988 çулта «Ĕç ветеранĕ» медале илме тивĕçлĕ пулать.
Пенсие тухсан та 7 çул Вăрмарти нефтебазăра вахтер тивĕçĕсене пурнăçлать.
Николай Егоровичăн кăкăрне çавăн пекех «Аслă Отечественнăй вăрçă çулĕсенче тÿрĕ кăмăлпа ĕçленĕшĕн» медаль, Аслă Çĕнтерÿ ячĕпе панă юбилей медалĕсем илем кÿреççĕ.
Тĕрлĕрен ытти наградăсем те унăн темĕн чухлех. Вăл обществăлла ĕçсенче хастар пулнине лайăх çирĕплетсе параççĕ. Унăн ĕç стажĕ 54 çул. Елена Романовна Тĕрлемесри икĕ çул вĕренмелли шкултан вĕренсе тухнă хыççăн кунти ялпора аслă бухгалтерта, Вăрмарти çул-йĕр уйрăмĕнче, Вăрмарти райсовет ĕçтăвкомĕнче аслă бухгалтерта, тата ытти çĕрте, нефтебазăра техникра 15 çул ĕçленĕ, унтан пенсие тухнă. Çĕнтерÿ кунĕнче вăл уйрăмах савăнăçлă. Чаплă уяв ячĕпе ăна «Татнефть» АУОн генеральнăй директорĕ хаклă парне ярса панă тата укçа парса хавхалантарнă.
Обществăлла ĕçсенче те активлă пулнă вăл, нумай çул хушши ăна халăх заседательне суйланă. Аслă Çĕнтерÿ тунă ятпа панă юбилей медалĕсем вăл тылра хастар ĕçленине кăтартса параççĕ.
- Московскинсен йăхне хаяр вăрçă пысăк сиен кÿчĕ. Нумайăшĕ вăрçă хирĕнче выртса юлчĕ, вăл шутра 9 офицер, - хурланни çинчен пĕлтерет тыл ĕçченĕ.
Николай Егоровичпа Елена Романовна пĕр ывăлпа хĕр пăхса ÿстернĕ.
Юрий Вăрмарти вăтам шкултан вĕренсе тухнă хыççăн ракета çарĕсен Дон çинчи Ростовра çарпа политика училищине вĕренсе пĕтернĕ. Ун хыççăн ăна Казахстана янă. Службăра 10 çул пулнă хыççăн Мускаври Ленин ячĕллĕ çарпа политика академийĕнче вĕреннĕ. Харьковри çарпа политика училищинче преподавательте ĕçленĕ. Полковник званипе запаса тухнă. Мăшăрĕ - Вера Федоровна - учительница. Икĕ хĕрĕ те аслă пĕлÿ илнĕ.
Тамара хĕрĕ Шупашкарти педагогика институтне вĕренсе пĕтернĕ. Виçĕ çул учительницăра ĕçленĕ. Халĕ ЧР Юстици министерствин аслă наука сотрудникĕ. Унăн Алена хĕрĕ Санкт-Петербургри планпа экономика университечĕн Шупашкарти филиалĕн 1 курс студентки.
Çапла Вăрмар поселокĕнчи хисеплĕ тыл ветеранĕсен - Чебослаевсен - пурнăç кун-çулĕ. Ĕçченлĕхĕпе палăрса тăраççĕ вĕсем халĕ те. Кил-çурта тап-таса тытаççĕ, пур çĕрте те йĕркелĕх хуçаланать. Темле ыйтупа кÿршĕсем, çывăхра пурăнакансем пырсан та яланах пулăшаççĕ. Эпир вара вĕсене малашнехи пурнăçра ăнăçусем сунатпăр.