08 июня 2010 г.
Тупах ялĕнче райадминистрацин ĕçĕсен управляющийĕ, организациллĕ ĕçсен пайĕн пуçлăхĕ Н.Павлов, ЧР Патшалăх Канашĕн депутачĕ В.Ильин, Кĕлкеш ял тăрăхĕн пуçлăхĕ В.Данилов ял халăхĕпе тĕл пулчĕç.
Тĕл пулăва çавăн пекех районти Госпожнадзор уйрăмĕн начальникĕ Д.Григорьев, РФ Патшалăх Думин депутачĕн В.Шурчановăн пулăшуçи В.Христофорова, ЧР Патшалăх Канашĕн депутачĕн В.Ильинăн пулăшуçи В.Кондратьев хутшăнчĕç.
Малтанах В.Ильин ял çыннисене РФ Патшалăх Думинче 2010 çулта йышăннă çĕнĕ саккунсемпе паллаштарчĕ. Д.Григорьев пушара хирĕç мĕнле ĕçсем тунине, унпа мĕнле кĕрешмелли çинчен ăнлантарса пачĕ. В.Кондратьев ялта шкулсене, ача сачĕсене хупмалла марри тата ял халăхĕн çĕр кĕнекисене мĕнле тĕрĕс йĕркелемелли, ялта шыв башни халăхшăн кирли çинчен каларĕ. Н. Павлов ял тăрăхĕ валли мĕнле ĕçсем пурнăçлама укçа куçарнине ăнлантарчĕ.
Юлашкинчен вĕсем ял çыннисен ыйтăвĕсем çине хуравларĕç. Н.Иванова электричество пралукĕсене улăштарманнине пула пушар тухма пултарас пирки калаçрĕ. Н.Николаева ял тăрăхĕн пуçлăхне В.Данилова çут çанталăк газĕ хăйсен хуçалăхне кĕртеймесĕр юлнине пула тĕрлĕрен пулăшу ыйтса ыйтусем пачĕ. Н.Павловские урамра çÿп-çап выртнине пула пушар тухма пултарни, хĕллехи вăхăтра урамсене юртан уçманни, пĕвесемпе-кĕперсем, масар çине кайма та çул çукки, ял клубĕ юхăнса кайни пăшăрхантарчĕ. В.Христофорова автобус чарăнăвĕнче будка çукки, колонкăсем йĕркеллĕ ĕçлеменни, шыв пахалăхĕ кирлĕ шайра пулманни пирки каларĕ.