25 мая 2010 г.
РФ Президенчĕн Указĕпе килĕшÿллĕн Раççейри предпринимательство кунне кашни çул майăн 26-мĕшĕнче анлăн паллă тума йышăннă. Çак уява халалласа райадминистрацин экономика, промышленность, суту-илÿ тата экономика аталанăвĕн пайĕ йĕркеленипе районти пĕчĕк тата вăтам бизнесра вăй хуракансемпе поселокри стадионра спартакиада иртрĕ. Ăна райадминистрацин ĕçĕсен управляющийĕ - организациллĕ ĕçсен пайĕн начальникĕ Н.Павлов уçрĕ, пай начальникĕ Н.Краснова уяв ячĕпе саламларĕ, малашне кун пек пысăк пĕлтерĕшлĕ мероприятисем кашни çулах ирттересси çинчен пĕлтерчĕ.
Спартакиадăна предпринимательсем йышлă пухăннă. Ачасемпе çамрăксен А.Федоров ячĕллĕ спорт шкулĕн аслă тренер-преподавателĕ Л.Агапова вĕсем валли тĕрлĕ спорт вăййисем йĕркеленĕ. Чи малтанах пухăннисем çăмăл атлетика енĕпе тупăшрĕç. Эстафетăна 35 çула çитичченхи арçынсем тухрĕç. Вĕсем 100 метр чупса лайăх результатсем кăтартрĕç. Пĕрремĕш вырăна С.Мартьянов («Стройсервис» тулли мар яваплă общество), иккĕмĕшне А.Хованский (Р.Хованская уйрăм çын предприниматель), виççĕмĕшне Д.Иванов («АВАН-ПОЛИМЕР» тулли мар яваплă общество) тухрĕç. Хĕрарăмсенчен 60 метр чупса çĕнтерÿçĕ ятне Л.Павлова («АВАН-ПОЛИМЕР») тивĕçрĕ. Иккĕмĕш вырăн Н.Герасимова (В.Ефимова уйрăм çын предприниматель), виççĕмĕшне Л.Степанова (Р.Хованская уйрăм çын предприниматель) йышăнчĕ. 35 çултан иртнисем хушшинче арçынсенчен 100 метр чупса малти вырăна О.Ильин («АВАН ПОЛИМЕР») малти вырăна тухрĕ. Иккĕмĕш вырăна Г.Назаров, виççĕмĕшне Ю.Васильев предпринимательсем тивĕçрĕç. Хĕрарăмсем те арçынсенчен кая юлмарĕç. 60 метр чупса Т.Кузьмина, Р.Таратина ( В.Енькова уйрăм çын предприниматель), М.Григорьева («Вăрмарти çăкăр завочĕ») малти виçĕ вырăна çĕнсе илчĕç.
Спартакиада хăйне евĕрлĕ çивĕч те интереслĕ иртрĕ. Хăшĕ-пĕрисем чăн-чăн спортсменсем пек лайăх результатсем те кăтартрĕç. Сăмахран, О.Ильин пек вăйлă чупаканни тата гранатăна чи аякка перекенни пулмарĕ. Г.Назаров вара 100 метр чупассипе çамрăксенчен пĕрре те юлмарĕ.
Граната персе иккĕмĕш вырăна С.Мартьянов, виççĕмĕшне А.Хованский тухрĕç. Хĕрарăмсенчен пĕрремĕш - Л.Павлова, иккĕмĕш - Л.Степанова, виççĕмĕш М.Быкова пулчĕç.
Дартс енĕпе тупăшса пĕрремĕш вырăна Ю.Васильев, иккĕмĕшне И.Афиногенов, виççĕмĕшне А.Хованский, Д.Иванов, С.Козеров, И.Федоров тухрĕç. Хĕрарăмсенчен малти вырăнсене Л.Павлова, В.Антонова, В.Ефимова йышăнчĕç.
Мечĕке баскетбол карçинккине тĕл персе кĕртессипе арçынсенчен В.Ефимов, Д.Иванов, С.Мартьянов малтисем пулчĕç. Хĕрарăмсенчен вара М.Быкова, Е.Макарова, Л.Никитина малти вырăнсене йышăнчĕç.
Çĕнтерÿçĕсене йĕркелÿ комитечĕ Хисеп грамотисемпе, парнесемпе чысларĕ, малашне те районта иртекен спорт мероприятисене хутшăнма чĕнсе каларĕ.