25 мая 2010 г.
РФ Центросоюз Президиумĕн Канашĕ потребкооперацисен 2009 çулхи ĕçне пĕтĕмлетнĕ. Чăвашпотребсоюз пылак шыв туса кăларассин калăпăшне ÿстерсе пынишĕн РФ Центросоюз Канашĕн Хисеп грамотине тивĕçнĕ. Çакăнта Вăрмар райповĕн тÿпи те пур.
Пылак шыв туса кăларассипе чылай çул райпон «Нива» тулли мар яваплă общество тăрăшса вăй хурать. Кăçалхи пĕрремĕш кварталти ĕç кăтартăвĕсем те курăмлă. Çак вăхăт тĕлне пурĕ 7пин те 850 декалитр пылак шыв, кисель - 10 тонна та 700, кăлпасси - 1 тонна та 400, кондитер изделийĕсем - 1 тонна та 900, тăварланă тата тĕтĕмлетнĕ пулă - 2 тонна та 900 килограмм, çурма фабрикатсем 223 пин тенкĕлĕх туса кăларнă. Продукцин пĕтĕмĕшле калăпăшĕ 1 миллион та 737 пин тенкĕпе танлашнă.
Палăртма кăмăллă: «Чăвашри сăра тинĕсĕ» республикăри фестивале райпон «Нива» тулли мар яваплă обществи 5 çул ытла хутшăнать. Кашнинчех кунта туса кăларакан «Грушевый аромат» пылак шыв ылтăн, «Тархун» кĕмĕл медальсене тивĕçнĕ. Çуллахи шăрăх кунсем пуçланнă май кунти ĕçе 2 сменăпа йĕркелеме палăртнă. Туса кăларакан продукци вара çийĕнчех сутăнса пĕтет. Пылак шыва райпон лавккисене тиесе ăсатаççĕ. Унсăр пуçне предпринимательсем, уйрăм çынсем хăвăрт туянса пĕтереççĕ. Продукци ассортиментне пуянлатассипе те тăрăшаççĕ кунти ĕçченсем. «Сливочные колбаски» кондитер изделине, «Южные» аш-какайран хатĕрленĕ апат-çимĕçе, «Персиковый чай» пылак шыва хапăлласах туянаççĕ.
Общество ÿсĕмĕ - пултаруллă та тăрăшуллă кадрсенче. Кунта тăрăшса вăй хуракан В.Михайлова мастер, А.Семенова оператор, Л.Александрова, О.Сидорова хăйсен ĕçĕнче чăн ăстасем темелле. Вĕсем тăрăшнипе общество ÿсĕм çулĕпе пырать.