18 мая 2010 г.
Аслă Çĕнтерÿ кунĕ умĕн республикăра велосипедпа чупас енĕпе тĕрлĕ ăмăртусем иртрĕç. Вăрмар спортсменĕсем вĕсенче курăмлă çитĕнÿсем турĕç. Акă шоссе çинче уйрăмшаррăн чупас енĕпе Çĕнĕ Шупашкар хулин уçă чемпионачĕпе мала тухассишĕн ирттернĕ ăмăртăвĕсенче 1998-1999 çулсенче çуралнисем хушшинче А.Чубуковпа М.Чубукова (Çиçтĕпе) 2-мĕш, 1996-1997 çултисем хушшинче Д.Яковлев (Кивĕ Вĕренер) 1-мĕш, 1994-1995 çулти арçын ачасенчен Н.Ивановпа (Пинер) А.Терентьев (Кавал) 2 тата 3-мĕш вырăнсене çĕнсе илнĕ.
Чăваш Ен кубокне çĕнсе илессишĕн иртнĕ иккĕмĕш тапхăрти ăмăртусенче 1996-1997 çулхисенчен Д.Яковлев каллех пĕрремĕш пулнă. Унăн тантăшĕсем, В.Васильева тата В.Михайлов (иккĕшĕ те Вăрмар поселокĕ), 1, 3-мĕш вырăнсене йышăннă. 1992-1995 çулсенче çуралнă спортсменсем хушшинче К.Питруков (Кĕтеснер) 3-мĕш, Н.Иванов (Пинер) 2-мĕш, А.Терентьев (Кавал) 4-мĕш вырăнсене тухнă.
Европа шайĕнче те палăраççĕ пирĕн ентешсем. А.Федоров ячĕллĕ ачасемпе çамрăксен Вăрмарти спорт шкулĕн воспитанникĕ пулнă, халĕ Мускавра ăсталăхне туптакан Н.Чубуков Германири ăмăртусенче маунтинбайк енĕпе виççĕмĕш пулнă.