14 мая 2010 г.
Республикăра ÿсĕме вăй паракан пысăк тухăçлă тата социаллă пĕлтерĕшлĕ инвестици проекчĕсене пурнăçлама кирлĕ условисем туса хунă. Пысăк пĕлтерĕшлĕ проектсене патшалăх енчен пулăшмалли механизмсем йĕркеленĕ. Производствăна лайăхлатма инвестицисем ăнăçлă хывнă тĕслĕх пирĕн районта та пур.
Вĕсенчен пĕри - «АВАН-ПОЛИМЕР» тулли мар яваплă общество. Кунта туса кăларакан продукци хамăр республикăра çеç мар, Раççейĕн тĕрлĕ регионĕсенче те лайăх сутăнать. Çавна май кăçалхи кăтартусем те курăмлă. Пĕрремĕш кварталта пурĕ 8 миллион та 227 пин тенкĕлĕх продукци туса кăларнă.
Хальхи вăхăтра ĕçе 3 сменăпа йĕркеленĕ. Тепĕр майлă каласан, кунти рабочисем улшăнса талăкĕпех тăрăшса вăй хураççĕ. Вĕсем пахча çимĕç сапма шлангсем кăлараççĕ. Пурĕ 10 тĕрлĕ продукци тухать кунта. Талăкне пĕрмеллĕ шлангсем - 700, армированнăй - 700, 20 метрлисене 500 тĕрке кăлараççĕ. Пĕр сменăра 250-300 шланг çыххи хатĕрлеççĕ. Асăннă издели çуллахи вăхăтра лайăх сутăнать.
«Пирĕн продукцие конвейер çинчен тÿрех тиесе каяççĕ. Туса кăларнă продукцие Раççейĕн тĕрлĕ регионĕсенчи туянакансем кĕтсех тăраççĕ. Çавăнпа та ĕçе виçĕ сменăпа йĕркелерĕмĕр. Хамăр ĕçре пахалăха тĕпе хуратпăр. Кунти ĕç процесне пĕтĕмпех механизациленĕ. Вырăнти халăха ĕçпе тивĕçтерессипе те тимлетпĕр. Çавна май районти ĕçпе тивĕçтерекен центрпа килĕшÿ тунă. Хальхи вăхăтра пирĕн предприятинче 34 çын тăрăшса вăй хурать. Вĕсен шутĕнче çамрăксем те чылай», - тет О.Ильин пуçлăх. Асăннă обществăн иксĕлми пуянлăхĕ - унта вăй хуракан ĕçчен çынсем. Чун туртнипе тăрăшакансен кăтартăвĕ яланах лайăх пулать. О.Ильин пуçлăх маттур ĕçлекен М.Орлов тĕп инженера, В.Григорьев инженер-электрика, Д.Петров аслă мастера, Н.Ильина, А.Дмитриева, Л.Александрова намотчицăсене ырăпа асăнчĕ. Шăпах çакнашкал маттур та хастар çынсене пула общество ĕçĕ кал-кал пулса пырать.