14 мая 2010 г.
Шупашкарти III кинофестиваль республика тĕп хулинче майăн 8-12-мĕшĕсенче иртрĕ. Пĕлтĕрхи пекех унăн президенчĕ «Мосфильм» концерн пуçлăхĕ Карен Шахназаров режиссер пулчĕ.
Сахал мар хисеплĕ хăна килнĕ тĕп хуламăра: Лидия Федосеева-Шукшина, Олег Ефремов, Алексей Нилов, Ирина Мазуркевич актерсем, Олег Ковалов, Вера Токарева, Вадим Цаликов режиссерсем. Пĕлтĕрхи пекех пур сеанса та тÿлевсĕрех кĕме май пулчĕ. Анчах çĕнĕлĕхсĕр те мар: кăçал уяв ялсене çитрĕ, Канаш, Муркаш районĕсенче, Етĕрне хулинче те кино курма май пулчĕ, ятарлă автоклуб пулăшнипе хир те, кирек мĕнле клуб та кĕске хушăра кинотеатра çаврăнчĕ.
Фестивале чаплă лару-тăрура Чăваш патшалăх академи драма театрĕнче майăн 12-мĕшĕнче хупрĕç. Жюри Вера Сторожеван «Скоро весна» форумри чи лайăх картина тесе палăртрĕ. Ятарлă призсем те пачĕç. ЧР Президенчĕн Н.Федоровăн парнине Мурат Сарулу режиссерăн «Семья», пресса жюрийĕпе куракансен парнине Вера Глаголеван «Одна война» тивĕçрĕç. «Бубен, барабан» фильмра вылянă Наталья Негода тата Алексей Мизгирев режиссер та «Анне» статуэткисемлĕ пулчĕç. Тĕрлĕ номинацисенче те ытти актерсемпе сценарисем призсем илчĕç. Карен Шахназаров çитес çулсенче Шупашкарти Пĕтĕм тĕнчери кинофестивальпе Раççей кинематографи çулталăкне хупма сĕннĕ. Апла тăк вăл малашне фестивальсен фестивалĕ пулĕ, хăйĕн çĕнтерÿçисене палăртĕ. Хальлĕхе вара çакă уçăмлă: Шупашкарти фестиваль пурăнать, малалла аталанать.