12 мая 2010 г.
Аслă Çĕнтерÿ тунăранпа 65 çул çитнине халалласа, Афган çĕрĕ çинче пуçне хунă Ю.Семенов интернационалист воина тата ял Совечĕн председателĕ пулнă А.Васильева асăнса Пинер ял тăрăхĕнче çăмăл атлетсем хушшинче йăлана кĕнĕ ăмăртусем иртрĕç.
Ăмăртăва 300 ытла спортсмен хутшăнма кăмăл турĕ. Тупăшăвăн тĕп тĕллевĕ - ырă, сывă пурнăç йĕркине тытса пырасси тата ачасемпе çулланнă çынсене спорта хутшăнтарасси, çăмăл атлетикăна татах та аталантарасси пулчĕ. Пирĕн шухăша вара РФ Патшалăх Думин тата ЧР Патшалăх Канашĕн депутачĕсем П.Семеновпа А.Разумов та ырласа йышăнчĕç. Ку хутĕнче П.Семенов хăй килеймерĕ, унăн пулăшуçи А.Чернов тата тин кăна Куславкка суйлав округĕпе Патшалăх Канашне суйланнă А.Разумов депутат хутшăнчĕç. Çавăн пекех райадминистрацин ĕçĕсен управляющийĕ - организациллĕ ĕçсен пайĕн начальникĕ Н.Павлов, воин-афганецсен районти организацийĕн председателĕ О.Ильин, ачасен спорт шкулĕн директорĕ С.Архипов, Пинер ял тăрăхĕн пуçлăхĕ Л.Боредская пулчĕç, ăмăртăва хутшăннисене хавхалантарса пычĕç.
Уяв таврашне яланах кил хуçисем ăшă сăмахсем каласа пуçлаççĕ, ку хутĕнче те çаплах пулчĕ. Спортсменсене ăмăрту ирттерме хутшăннă яваплă çынсем те ăнăçусем сунса ăшшăн саламларĕç. Вĕсене Пинерти пуçламăш класс ачисем çул уçса пачĕç. Вĕсем 300 метра чупрĕç. Хутăш эстафетăра 4 - 9 класс ачисем - кашни командăра 3 хĕрача та 3 арçын ача - 400 метра чупрĕç. Кроса хутшăнакан 10 - 11 класра вĕренекен каччăсен 2 километра, хĕрĕсен - 1 километра, 40 çула çитмен тата çак çултан иртнĕ арçынсен - 1 километра, хĕрарăмсен 500 метра чупса ăмăртмалла пулчĕ.
Спортсменсем пурте активлăх кăтартрĕç. Ăмăрту сăмах пур пулсан кунта çĕнтерÿçĕсем те пулмалла ĕнтĕ. 40 çула çитмен хĕрарăмсенчен Н.Николаева, Пинер шкулĕнчи повар, 1-мĕш вырăна çĕнсе илчĕ. Çак çулхи арçынсенчен Кĕлкеш шкулĕнчи А.Павлов 1-мĕш, Пинер шкулĕнчи В.Федоров иккĕмĕш вырăнсене тухрĕç. 40 çултан иртнисенчен 1-мĕш вырăна ачасемпе çамрăксен Вăрмарти спорт шкулĕнчи Л.Агапова тренер, 2-мĕш вырăна Л.Михайлова, Пинерти библиотекарь, 3-мĕш вырăна Г.Чернова, Пинер шкулĕнчи директорăн вĕрентÿпе воспитани енĕпе ĕçлекен заместителĕ, тухрĕç. Çак çулхи арçынсенчен район администрацийĕнчи Н.Павлова çитекенни пулмарĕ, 2-мĕш вырăна Н.Михайлов тухрĕ. Çĕнтерÿçĕсене Хисеп грамотисемпе асăнмалăх парнесем парса хавхалантарчĕç. Пĕчĕккисене пылак кучченеçсемпе савăнтарчĕç.
Ăмăртăва йĕркелекенсемпе вĕсен спонсорĕсем те пулчĕç: Пинер ял тăрăхĕпе шкулĕ, Ю.Иванов, В.Енькова, Г.Назаров уйрăм предпринимательсемпе районти райпо тата афганецсен районти организацийĕ.
РФ Патшалăх Думин тата ЧР Патшалăх Канашĕн депутачĕсем çитес çулхи ăмăртăва виçĕ районпа - Вăрмар, Куславкка, Сĕнтĕрвăрри - ирттерме пулчĕç, спонсорĕсем пулма та шантарчĕç.