30 апреля 2010 г.
Энтриялĕнчи Бауман урамĕнче пурăнакансем пурте пуçтарăнса хăйсен урамне тирпей-илем кÿчĕç. Вĕсен хĕрÿ ĕçĕ Н.Разумов вăрçă ветеранĕн çурчĕ тĕлĕнчен пуçланчĕ. Вăл çак урамра 10-мĕш çуртра пурăнать. Николай Кириллович февраль уйăхĕнче ăнсăртран ÿксе урине хуçнă пирки халĕ тăраймасăр выртать. Ватă ветеран кÿршисене ăшшăн тав турĕ, ăнăçу сунчĕ, ватăсене пулăшса тăнăшăн кăмăллă пулчĕ.
Ялта халĕ пушă çуртсем нумайланчĕç. Бауман урамĕнче вĕсем - тăваттă. Воскреснике хутшăнакансем çак çуртсем умĕнчи тасамарлăха тĕппипе тасатрĕç. Ĕç вĕресе кăна тăчĕ. Ăна С.Ефимов йĕркелесе пычĕ. Унăн хĕрĕсем: Марина, Надежда, Наташа тăрăшса ĕçлерĕç. Вĕсемпе пĕрле Т.Иванова, Т.Андреева, Владимирпа Лариса Ефимовсем, Ю.Алексеев хавхаланса ĕçлерĕç.
Вăрçă ветеранне, тивĕçлĕ канăва тухнă ватăсене пулăшни, çут çанталăк тасалăхĕшĕн вăй хурса тăрăшни ырă ĕç туни пулать. Çакна пурте асра тытса кăмăллăн ĕçлерĕç Бауман урамĕнче пурăнакансем.