27 апреля 2010 г.
Физкультурăпа спорт комплексĕнче И.Алешин инструктор чи кирлĕ специалистсенчен пĕри. 15 сехетрен пуçласа 16 сехет те 30 минутчен 1998-2000 çулсенче çуралнă ачасене бассейнра ишме вĕрентет. 17 ача çÿрет, унтан атлетика залне килнĕ çамрăксемпе, каярахпа вара аэробикăпа фитнес секцийĕнче занятисем ирттерет.
Акă паян та ун патне Вăрмарти пĕрремĕш вăтам шкулта вĕренекен кĕçĕннисен ушкăнĕнчи О.Чернова, Г.Петров, И.Голубев, Р.Егоров, О.Иванова, Н.Петров, Н.Чернова, К.Клементьев, А.Силеров, К.Иванов тата Чулкас шкулĕнчен Д.Федоровпа А.Петров, аслă ушкăнри А.Чернов, М.Семенов, Д.Васильев палăртнă вăхăтра çитрĕç. Тренер вĕсемпе чи малтанах заняти ирттерчĕ, шывра ишнĕ чухне алăсемпе тата урасемпе мĕнле ĕçлемеллине кăтартрĕ. Ун хыççăн вĕсем душра çăвăнчĕç те бассейна куçрĕç. Кунта шывра ишме вĕренмелли хăмасемпе мĕнле ĕçлемелли çинчен кăтартрĕ. 3-мĕш «г» класра вĕренекен Артем Силеров çапла хавхаланса каласа парать: «Ишме вĕренмелли секцие эпĕ кăçалхи январь уйăхĕнче çÿреме пуçларăм. Малтан манăн инструктор Светлана Николаевна Иванова пулнăччĕ. Халĕ вара Игорь Владимирович Алешин патĕнче вĕренетĕп. Занятисене йĕркеллĕ çÿретĕп».