23 апреля 2010 г.
Аслă Çĕнтерÿ 65 çул тултарнине халалласа апрелĕн 16-18-мĕшĕсенче ачасен Вăрмарти ÿнер шкулĕнче вĕренекенсем поселокри «Березка», «Колосок», «Зоренька», «Ромашка» ача сачĕсенче концертсем лартса пачĕç. Пурте вĕсем «Эпир савăнăçлă пурăнма çуралнă» лозунгпа иртрĕç. Мероприятисен тĕллевĕ те питĕ анлă пулчĕ: çул çитмен ачасемпе çыхăнăва çирĕплетесси, çар юррисене сарасси... Çамрăксене Т.Гаврилова, О.Бережецкая преподавательсем, Л.Ковалевская концертмейстер йĕркелесе ертсе пычĕç. Программăра Ф.Шопен, В.Листов, В.Шаинский композиторсен, чăваш, вырăс, украин, эрмен халăх юррисем янăрарĕç, чикан, хĕвел тухăç ташшисем пулчĕç. Ÿнер шкулĕнче вĕренекенсене вĕт-шакăрсем тимлĕ итлерĕç, вăрçă теми çак çулсенчи ачасемшĕн питĕ çывăх. Нумайăшĕ пирĕн патне çÿреме те кăмăл пуррине пĕлтерчĕç. Кунта тĕрлĕ музыка инструменчĕсене алла илме май пурри те хавхалантарчĕ вĕсене.