23 апреля 2010 г.
Тăван çĕршывăн Аслă вăрçи халăх асĕнче ĕмĕрлĕхех юлĕ. Çамрăк ăрурисем те совет салтакĕсен паттăрла ĕçĕсене манмаççĕ. Вĕсем çинчен тăтăшах вуласа интересленеççĕ, сăвăсем çыраççĕ, юрăсем хываççĕ. Чулкасри пĕтĕмĕшле пĕлÿ паракан тĕп шкулта Аслă çĕнтерĕве халалласа «Астăвăм пире канăç памасть» ятпа ÿкерчĕксен конкурсĕ ирттернĕ. Çак конкурсра А.Артемьева, К.Петрова, А.Сорокина, М.Чикунов, Д.Филиппов, Д.Криворученко çĕнтерÿçĕсем пулса тăчĕç. Çавăн пекех Анаткас ялĕнче пурăнакан вăрçă ветеранĕпе Агриппина Васильевна Васильевăпа та 4-мĕш класра вĕренекенсем (класс руководителĕ Г.Иванова) тĕл пулу ирттернĕ. Шкулта тимуровецсен команди те активлă ĕçлет. Вĕсем тыл ĕçченĕсем, ялти ватăсем патне кайса вĕсене кил-тĕрĕшре пулăшса тăраççĕ.