23 апреля 2010 г.
Кунти кашни вĕрентекен хăйĕн пурнăçне ачасене халалланă. Г.Иванова директор та кунĕн-çĕрĕн шкулта, çуллахи каникулсенче те ачасемпе пĕрле вăл. Университетра вĕреннĕ чухнех студентсемпе пĕрле ятарласа ĕçлеме каякан отрядсене ертсе пынăскер, шкулта ĕçленĕ вăхăтра та районти ачасене тĕрлĕ çĕре ĕçлеме илсе кайса çÿренĕ. Тĕслĕхрен, Астрахань тата Волгоград облаçĕсене пĕр çул кăна мар - 16 çул илсе кайнă. Çак хушăра унта пурĕ 4167 шкул ачи кашни каникулта ĕçпе пĕрле кайса каннă. Хăш-пĕр ачасем пĕр çемьерен иккĕн-виççĕн те, 7-8 хут кайнă. Ĕç воспитанийĕ ачасемшĕн дисциплинăна, яваплăха, хăйшĕн хăй тăма пултараслăха ÿстернĕ, коллективпа пурăнма хăнăхтарнă, паянхи пурнăçăн чăн-чăн çыннисене çитĕнтерме пулăшнă.
Паянхи кун та Галина Алексеевнана ачасем тав сăмахĕсем калаççĕ. Вĕсенчен чылайăшĕ халĕ районта яваплă вырăнсенче ĕçлеççĕ.