23 апреля 2010 г.
Вĕрентÿ сферинчи наци проектне ăнăçлă пурнăçлама асăннă шкулта иртнĕ çулсенчех вĕренÿпе пурлăх базине хатĕрленĕ. Республикăра «Çĕнĕ шкул» программа анлăн пурнăçа кĕрсе пынă май, вĕрентÿ учрежденисенче паха пĕлÿ парасси тĕп вырăн йышăнать. Пултаруллă ачасемпе çине тăрса ĕçлени - шкулсен инноваци программисене тата педагогсене пулăшмалли тытăмăн пысăк пĕлтерĕшлĕ енĕ. Иртнĕ çул тата кăçал тĕрлĕ шайри ăс-хакăл тупăшăвĕсене Чулкасри пĕтĕмĕшле пĕлÿ паракан тĕп шкултан 57 ача хутшăннă. Вĕсенчен республикăри олимпиадăсене, конкурссене - 21, районтисене 36 ача хутшăннă. 2009 - 2010 вĕренÿ çулĕсенче республикăра иртнĕ «Тăван çĕршывăн Аслă вăрçи ачасен куçĕпе» конкурсра 9-мĕш класра вĕренекен А.Артемьева пĕрремĕш вырăн çĕнсе илнĕ. Çавăн пекех республикăра иртнĕ «Тискер чĕрчунсен тĕнчи» конкурсра К.Минин иккĕмĕш вырăн йышăннă. «Пушара хирĕç кĕрешекен: ĕнер, паян, ыран» ятпа иртнĕ республикăри конкурсра К.Петрова - пĕрремĕш, А.Уливанова виççĕмĕш вырăнсене тивĕçнĕ.
Çулсеренех пирĕн республикăра А.Г.Николаев космонавта халалласа «Николаев вулавĕсем» иртеççĕ. Чулкасри пĕтĕмĕшле пĕлÿ паракан тĕп шкул ачисем унта хаваспах хутшăнаççĕ. Иртнĕ çул А.Петров иккĕмĕш вырăн йышăннă. Кăçал вара асăннă конкурса хутшăннă 800 ачаран Д.Филиппов финала тухнă.
Районта пулса иртекен тĕрлĕ олимпиадăсемпе конкурссене кунта вĕренекенсем активлăн хутшăнаççĕ. Районта кĕçĕн классемпе иртнĕ интеллектуаллă вăйăсене хутшăнса М.Черновский - пĕрремĕш, А.Павлова, В.Федорова - иккĕмĕш, Н.Васильева виççĕмĕш вырăн çĕнсе илнĕ. Çавăн пекех обществознани предмечĕпе М.Смирнова - иккĕмĕш, тăван ен культурипе А.Петров - иккĕмĕш, акăлчан чĕлхипе М.Смирнова - виççĕмĕш, биологипе Э.Иванова виççĕмĕш вырăн йышăннă. Экологи темипе çыхăннă наукăпа практика конференцинче Э.Иванова - пĕрремĕш, М.Смирнова иккĕмĕш вырăна тивĕçнĕ. «Пушкин вулавĕсем» конкурсра Э.Иванова çĕнтерÿçĕ пулса тăнă. Командăсене илес пулсан, Чулкас шкулĕн команди иккĕмĕш вырăна тухнă. Пĕтĕм Раççейри «Русский медвежонок» конкурсăн призерĕ М.Чикунов пулса тăчĕ. 2-4-мĕш классенче вĕренекенсем фольклор ушкăнĕн активлă членĕсем. «Чăваш чĕлхин Пĕтĕм тĕнчери кунĕ» музыка конкурсĕнче 4-мĕш класра вĕренекенсем пĕрремĕш вырăн çĕнсе илнĕ. Директорăн вĕрентÿпе воспитани енĕпе ĕçлекен заместителĕ С.Уливанова палăртнă тăрăх, 9-мĕш класра вĕренекен М.Смирнова районти чи лайăх 10 шкул ачи шутне кĕнĕ. Вăл çак рейтингра саккăрмĕш вырăн йышăнать. Районта иртнĕ «Саккунпа йĕркелĕх хуралĕнче» наукăпа практика конференцийĕнче М.Смирнова пĕрремĕш вырăна тивĕçнĕ. Çавăн пекех 8-мĕш класра вĕренекен Э.Иванова пултарулăхне те палăртмалла. Вăл районти, республикăри олимпиадăсене активлă хутшăнать, призлă вырăнсене çĕнсе илет. Шкулта та пиллĕк паллăсемпе вĕренет. Вĕренÿпе пĕрлех тĕрлĕ кружоксенче те пысăк тăрăшулăх кăтартать. Унсăр пуçне хăйĕн пĕлĕвне ачасемпе çамрăксен искусство шкулĕнче ÿстерет.
Физкультурăпа тата спортпа хавхаланни, спорт ăмăртăвĕсене хутшăнни ачасен сывлăхне çирĕплетет. Çавна май вĕсем курăмлă кăтартусем тăваççĕ. Районта мини-футболла выляссипе иртнĕ тупăшура аслă классенче вĕренекен яш-кĕрĕм команди виççĕмĕш, волейболла выляса иккĕмĕш вырăнсене тивĕçнĕ. Йĕлтĕрпе чупассипе те лайăх кăтартусем кăтартаççĕ Чулкас шкулĕнче П.Петров, А.Бармаков, А.Петров вĕренекенсем. Шкул эстафетинче пиллĕкмĕш, улттăмĕш, саккăрмĕш класс командисем малти вырăна тухнă.