23 апреля 2010 г.
«Ырă ĕçсем урлă - тĕнче культури патне!» девизпа апрелĕн 17-24-мĕшĕнче Чăваш Енре иртекен Пĕтĕм Раççейри «Çуркуннехи ырăлăх эрнинче» В.Волков уйрăм предприниматель районти тĕп библиотекăна 52 кĕнеке парнеленĕ. Вĕсен шутĕнче илемлĕ литература, детективсем, историллĕ тата политика кĕнекисем. Халĕ тавра пĕлÿ залĕнче ятарлă курав ĕçлет. Ĕçрен пушă вăхăтра хăй те кĕнекесенчен уйрăлмасть Вячеслав Риксович. Вуласа тухнă литературăна ыттисем патне çитерес тесе вулавăшсене парать. Пĕлтĕр те вăл ыр кăмăллăх эрнине хутшăнса тĕп библиотекăнах вуншар-вуншар кĕнеке панăччĕ.
Çавăн пекех эрнене хутшăнса библиотекăн ĕçлĕ тата вĕренÿ литератури уйрăмĕнче Э.Демьянова библиотекарь Раççейри меценатсен ĕçĕ-хĕлĕпе паллаштаракан кĕнекесен куравне йĕркеленĕ. С.Морозов, П.Третьяков, Строгоновсен, Демидовсен йăхĕсем çынсене тĕрлĕ енлĕ пулăшу кÿнипе историе кĕрсе юлнă. Вĕсем çинчен пирĕн пĕлмеллех. Çакна тума курав пулăшать те. Биографийĕсемпе паллаштарнисĕр пуçне кашни курăмлă ĕçĕ çинчен кирлĕ литература шыраса тупма пулать кунта. Чăвашсене çутта кăлараканĕ И.Яковлев та нумай-нумай ырă ĕç тунă. Иван Яковлевич çинчен чылай пĕлетпĕр пулин те, кунта уйрăм ĕçĕсем çинчен тĕплĕнрех пĕлме пулать.