23 апреля 2010 г.
Кавалти çыхăну уйрăмĕнче тăрăшакан Надежда Апполоновна Алексеева Пĕтĕм Раççейри професси ăсталăхĕн «Çулталăк почтальонĕ» конкурсĕн финалне тухнă. Июльте, Раççей почтин кунĕ умĕн, вăл чи лайăххин ятне тивĕçессишĕн тупăшĕ. Надежда сăнне корпораци журналĕн хуплашкине вырнаçтарнă.
Раççей почти конкурсăн черетлĕ тапхăрне пĕтĕмлетнĕ: федераци округĕнче мала тухнă çыхăну ĕçченĕсем кĕçех Мускавра тĕл пулĕç. Финалистсене ON-LINE йĕркипе ирттернĕ видеоконференцири калаçу тăрăх палăртнă. Çак меслет регионсенчи почтальонсене кулленхи ĕçрен уйрăлмасăрах тупăшăва хутшăнма май панă: вĕсем хăйсене презентациленĕ, професси тесчĕ витĕр тухнă, жюри ыйтăвĕсене хуравланă, почта историне, çыхăну пулăшăвĕн, ĕç сыхлавĕн правилисене, инструкцисене аван пĕлнине çирĕплетнĕ.
Пĕтĕм Раççейри конкурсра çĕршывăн ултă округĕнчен пĕрер, федерацин Атăлçи округĕнчен 2 почтальон (Надежда Алексеевапа Пермь крайĕнчи Борис Созонов) вăй виçĕç.