23 апреля 2010 г.
Майăн 8-12-мĕшĕсенче Шупашкарта Пĕтĕм тĕнчери кинофестиваль иртет. Ăна РФ Культура министерстви пулăшнипе йĕркелеççĕ. Уява кăçал Аслă Çĕнтерÿ 65 çул тултарнине халалланă.
Фестивалĕн тĕп тĕллевĕ - пур ăрури куракана та хăйсем валли кирлине, чуна çывăххине тупма пулăшасси. Çавăнпа та уявра хальхи кинофильмсене çеç мар, вăрçă çинчен ÿкернисене те пăхма май килĕ. «Çеçпĕл», «Мир Луксор», «Атăл» кинотеатрсем, «Салют» культура керменĕ куракансене хаваспах йышăнĕç. Сăмах май, кăçал программăна çĕнĕлĕх кĕртнĕ: фестиваль кинофильмĕсене хăш-пĕр ялта та «çавăрттарĕç». Кăçал та билетсене тÿлевсĕр, сеанс кунĕнче валеçĕç.
Шупашкарти фестивале Раççей кинематографи «çăлтăрĕсем» килсе çитĕç. Сăмахран, Лидия Федосеевна-Шукшина, Михаил Ефремов, Никита Высоцкий, Артур Бах тĕрлĕ тĕл пулусем, мастер-классем ирттерĕç. Уява Михаил Светин, Ирина Мазуркевич, Анатолий Равикович уçĕç. Çавăн пекех «оперсене» - Алексей Ниловпа Анастасия Мельникована, Сергей Селина - кĕтсе илĕпĕр. Тепĕр çĕнĕлĕх: фестивале хупма «Чĕнтĕрлĕ чаршав» конкурсăн çĕнтерÿçисем те хутшăнĕç.