20 апреля 2010 г.
Ял лавккин сăн-сăпачĕпе те, ĕçлев хатĕрĕсемпе те паянхи пурнăçран юлмалла мар. Вăл илемĕпе, ассортименчĕпе, культурипе пысăк хуларисенчен уйрăлса ан тăтăр.
Тен, суту-илÿ культуринчен те лайăхрах пулмалла, мĕншĕн тесен унта пĕр-пĕрне лайăх пĕлекен çынсем çÿреççĕ, сутуçăсемпе те куллен хутшăнаççĕ, мĕнле ĕçленине кураççĕ, вĕсем тăрăх райпо ĕçне хак параççĕ. Акă Чулкасри райпо лавккинех илер-ха. Вăрмар райповĕ 80 çул тултарнă май, кунта та чылай ĕçсем туса ирттернĕ. Иртнĕ çул ăна çĕнĕ сăн кĕртрĕç. Халĕ кунта тавара ирĕклĕ майпа туянма пулать. Çакă туянаканшăн питĕ меллĕ. Мĕн кирлине пĕтĕмпех хăй курса, пăхса илме пултарать.Çĕнĕ йышши холодильниксем, суту-илÿ оборудованийĕ вырнаçтарнă. Халăха çак лавкка апат-çимĕç продукчĕсен ассортименчĕ пуян пулнипе (1000 яхăн тĕрлĕ тавар туянма пулать кунта), хăтлăхĕпе, сутуçăсен тараватлăхĕпе илĕртет. Асăннă лавкка заведующийĕ Полина Николаевна Илларионова çак ĕçре 27 çул тăрăшса вăй хурать. Тавар туянакансемпе вăл яланах ăш-пиллĕ те тарават. Мĕн кирлине пĕтĕмпех çийĕнчех тивĕçтерме тăрăшать. «Райпо лавккине кĕрсен эпир хамăра килти пекех туятпăр, мĕншĕн тесен Полина Николаевна тараватлăхĕ иксĕлми. Унсăр пуçне продукци ассортиментне те çĕнетсех пыраççĕ. Çăкăр, çăкăрпа булка изделийĕсене те тин пĕçернисене кÿрсе килеççĕ», - теççĕ тавар туянакансем. Уйăхне халăха кирлĕ тавар вăтамран 400-450 пин тенкĕлĕх сутаççĕ кунти ĕçченсем. П.Илларионова заведующи, А.Димитриева сутуçă, С.Щербакова рабочи хăйсен ĕçне пысăк пахалăхпа пурнăçласа пыраççĕ.