16 апреля 2010 г.
«Ĕçрен ан хăра, вăл санран хăраса тăтăр». Ваттисен çак сăмахне Кивĕ Вăрмарти Юлия Никитина çамрăклах ăша хывнă.
Юлташĕпе - Нина Ильинапа - строитель пулма ĕмĕтленнĕ. Ялти шкулта 8 класс вĕренсе пĕтернĕ хыççăн вĕсем Сĕнтĕрвăрринчи 12-мĕш номерлĕ профессипе техника училищине вĕренме кĕреççĕ. Штукатур-маляр профессине алла илеççĕ. Юля ĕçе Вăрмарти строительствăпа монтаж управленине (СМУ) вырнаçать. Çамрăк хĕр ача 4-мĕш разрядпа вăй хума тытăнать. Шанса панă ĕçе тÿрĕ кăмăлпа, яваплăха туйса пурнăçлать, ĕç пахалăхĕ çине уйрăмах тимлĕ пăхать. Çавăншăн ăна коллективра хисеплеççĕ. Хастар строителе «Коммунизмла ĕç ударникĕ» знакпа наградăлаççĕ, унăн сăн ÿкерчĕкне кунти Хисеп хăми çине кĕртеççĕ. Часах вăл хăйĕн ĕçне обществăлла апатлану предприятийĕпе çыхăнтарать. «Общепит» тулли мар яваплă обществăн директорĕ И.Иванов патне ĕçе кĕме пырсан Юльăна çапла каланă: «Малтанлăха хамăр патăрта хăнăхтарăпăр, унтан вĕренме Шупашкара ярăпăр. Повар профессийĕ вăл пурнăçра питĕ кирлĕ. «Куç хитрине юратать, тута - тутлине», теççĕ мĕн ĕлĕкрен. Качча тухăн та акă упăшкуна тутлă апат пĕçерсе парăн, вăл вара кăмăллă пулĕ». Çапла вара Шупашкарти курсран вĕренсе тухнăранпа мĕн паян кунчченех тÿрĕ 37 çул та, 6 уйăх та 17 кун ĕçлесе тивĕçлĕ канăва тухрĕ Юлия Васильевна. Хăйĕн пархатарлă ĕçне халĕ малалла тăсать. Туслă коллектив чăмăртаннă «Юность» кафере. Аслă повар Т.Викторова, пĕрремĕш блюдо хатĕрлекен А.Смирнова, кукăльсем пĕçерекен О.Васильева тата ыттисем хăйсен ĕçне чунтан парăннă. Кунта килекенсемпе кăмăллăн калаçаççĕ, тутлă апатпа тивĕçтереççĕ.
- Çак тапхăрта хуçасем нумай улшăнчĕç. Пурне те лайăх енчен çеç калатăп эпĕ. Çĕрле «Юбилейная» ресторанта ĕçлеттĕм, кăнтăрла «Юность» кафере 5 кун ĕçлесе 5 кун канатăп. Хама килĕшекен ĕç йывăр тесе нихăçан та каласа курман. Кашни кунах ĕçе хавхалануллă кăмăл-туйăмпа утатăп, - тет калаçăва малалла тăсса Юлия Васильевна.
Пĕрле ĕçлекенсем ун тăрăшулăхĕнчен чăннипех те тĕлĕнеççĕ. Пĕрле тăрăшакан çамрăксемшĕн вăл ырă тĕслĕх пулса тăрать. Обществăлла апатлану предприятийĕн директорĕ М.Сейфуллина та унăн ĕçĕпе кăмăллă.
- Темĕн те хатĕрлеме пĕлет вăл, нумай çул ĕçлесе пуян опыт пухнă, çамрăксене вĕрентсе пырать. Кашни праçникех активлă хутшăнать, - пĕлтерет Мария Аркадьевна. Çамрăклăх малаллах шунă. Пĕве кĕрсе пынă май, çемье çинчен те шухăш çуралать. 1979 çулхи декабрь уйăхĕнче Юлия хăйсен ялĕн каччипе Вячеслав Анатольевич Никитинпа çемье çавăраççĕ. Виçĕ ача çуратса пăхса ÿстереççĕ вĕсем. Аслă ывăлĕ - Женя ĕçлеме Мускава çÿрет. Кинĕ - Инга - суту-илÿре тăрăшать. Диана хĕр ачи пур. Андрей ывăлĕпе Алина кинĕ «Урмарская» кайăк-кĕшĕк фабрикинче вăй хураççĕ. Андрей - водитель, Алина - бухгалтер. «Çамрăк çемье» программăпа çурт-йĕр çавăрма ипотека кредичĕ илнĕ. Кермен пек чаплă çурт яла илем кÿрет. Вĕсен София хĕр ачи çитĕнет. Алена Шупашкарта ĕçлесе пурăнать. Юлия Никитина «Ĕç ветеранĕ» ята тивĕçнĕ.