16 апреля 2010 г.
Çурхи шывпа пĕрлех хресченĕн хĕрÿ самант вăхăчĕ те хапха умне çитсе тăчĕ. Пурте çĕр типессе кăна кĕтеççĕ. Кĕçех уй-хирте тракторсем умлăн-хыçлăн акана тухĕç. Унччен вара тумалли ĕçсем сахалах мар-ха. Хăш-пĕр хуçалăхсенче акмалли вăрлăхсене тахçанах хатĕрлесе çитернĕ, хăшĕсенче вара лару-тăру чаплах мар.
«Вăтам Энĕш» хуçалăхра вăрлăхлăх тырă хăйсем валли те, сутлăх та çителĕклех. Эпир пынă кун та хуçалăхра тырă аллакан складра Б.Яранов, Ю.Андреев, В.Сидиков рабочисемпе Т.Афанасьева агроном çĕнĕ йышши сывлăшпа вĕртерсе вăрлăх аллакан САД-7 агрегата татти-сыпписĕр ĕçлеттеретчĕç. «Ку агрегат пур ял хуçалăх культурисене те аллать, люцерна, горчица вăрлăхĕсене те аллама питех те меллĕ, тĕрлĕ фракцисемпе кăларать. Хуçалăх валли алласа çитернĕ, халĕ хамăр патĕнче аллас кăмăллисене пулăшатпăр», - тет Татьяна Александровна. Сăмах май каласан, вăл кунта Шупашкарти ял хуçалăх академийĕнчен вĕренсе тухнă хыççăн тÿрех ĕçлеме тытăннă. Ĕçлес хастарлăхĕ пысăк çамрăкăн.
Хальхи вăхăтра Кĕтеснер ялĕнчи А.Захаров фермер кунта горчица вăрлăхне аллатарать. Ку сидератлă культурăна пур вăхăтра та акма юрать, мĕншĕн тесен вăл çĕр пулăхлăхне лайăхлатать. Çĕр улми ани çине кĕркунне аксан, тĕрлĕ хурт-кăпшанкăсемпе чир-чĕре те сахаллатма пулăшать иккен. Çавăнпа та А.Захаров ку культурăна акмалăх та, сутлăх та çителĕклĕ хатĕрленĕ. «Россельхозцентрăн» районти специалисчĕсем (вăрлăх инспекцийĕ) палăртнă тăрăх горчица вăрлăхĕн тасалăхĕ те, шăтаслăхĕ те пысăк шайра.