13 апреля 2010 г.
Мухтава тивĕçлĕ вĕрентекенсем кашни шкултах пур.
Сăмахăм Вăрмарти Г.Е.Егоров ячĕллĕ пĕрремĕш вăтам шкулти О.Н.Ларионова вĕрентекен çинчен.
«Çулталăкри чи лайăх вĕрентекен - 2010» конкурсра вăл «Пултарулăхпа профессионализм» номинацире çĕнтерÿçĕ ята тивĕçрĕ. Çакă Ольга Николаевна чăннипех те пултаруллă педагог, вĕрентÿ ĕçне чунĕпе парăннă çын пулнине çирĕплетет.
Ольга Николаевна шкулта вĕреннĕ çулсенчех учитель профессине суйласа илме тĕв тунă. Тăвай районĕнчи Элпуçри вăтам шкула пĕтернĕ хыççăн вăл И.Я.Яковлев ячĕллĕ Чăваш патшалăх педагогика институтне вĕренме кĕрет. Вĕрентекен профессине алла илсен пурнăç çулĕ Ольга Николаевнăна Вăрмар районне илсе çитерет. Вĕсем Вăрмар район каччипе, Юрий Ларионовпа, çемье çавăраççĕ. Çамрăк педагога Анаткас шкулне ĕçлеме яраççĕ. Икĕ çул хушши вăл ачасене çак шкулта акăлчан чĕлхи вĕрентет.
1994 çултанпа Ольга Николаевна Вăрмарти пĕрремĕш вăтам шкулта вăй хурать.
Вăл ирттерекен уроксенче анасласа ларма вăхăт çук. Пĕри калаçнă вăхăтра ыттисем те ахаль лармаççĕ. Пур ачана та урок юхăмне кĕртсе яма пултарать пултаруллă вĕрентекен. «Эпĕ хамăн ĕçе юратмаллипех юрататăп. Вĕсемпе пĕрле кашни кун хамăн та мĕн те пулин çĕннине пĕлес килет, - тет Ольга Николаевна.
Вĕренÿ процесĕнче Ольга Николаевна компьютерпа анлăн усă курать, ачасене тĕрлĕ презентацисене йĕркелес, проектсем хатĕрлес ĕçе явăçтарать. Республика шайĕнче акăлчан чĕлхипе иртекен тĕрлĕ конкурссене хутшăнаççĕ унăн вĕренекенĕсем. Акă нумаях пулмасть вĕсем «Единство в различи: Россия, Чувашия, Великобритания» конкурсăн пĕрремĕш турĕнче лайăх результатсем кăтартса иккĕмĕш тура тухрĕç.
Ольга Николаевна, яланах шыравра. Хăй калашле ăна çакăн йышши конкурссем çĕнĕ вăй параççĕ, çĕнĕ шухăшсем çуратаççĕ. 2008-мĕш çулта Ольга Николаевна «Самый классный классный» конкурса хутшăнса район çĕнтерÿçи ята тивĕçрĕ, республика шайĕнче финала тухма пултарчĕ.
Çитĕнÿ çăл куçĕ мĕнре-ха; Ман шутпа, Ольга Николаевна ачасене кирек мĕнле ĕçе те тума шаннинче, вĕсене ăнланма, кирек мĕнле ĕçпе те кăсăклантарма пĕлнинче. Шкул ĕçĕпе пĕрлех Ольга Николаевна юрлама, вулама, çул çÿреве çÿреме юратать. Юрлама тесен... Мăшăрĕ купăспа калама ăста, Ольга Николаевнăпа хĕрĕсем кирек мĕнле юрра та артистсенчен кая мар шăрантараççĕ.
Çакна та каласа хăвармалла: Ларионовсен çемйи - туслă та тараватлă çемье. Хĕрĕсем те ашшĕпе амăшĕ пекех пултаруллă, çемье чысне çÿлте тытаççĕ. Аслă хĕрĕ, Наталия, Чăваш патшалăх университетĕнчи медицина факультетĕнче ăс пухать. Кĕçĕнни, Кристина, шкулта аван паллăсемпе вĕренет, кирек мĕнле ĕçре те пултарулăхпа палăрса тăрать.
Пĕрремĕш шкулта ĕçлекенсем Ольга Николаевнапа мухтанаççĕ, вăл 2010 çулхи конкурсра «Пултарулăхпа профессионализм» номинаци çĕнтерÿçи ята тивĕçнипе мăнаçланаççĕ. Ăна малашне те хавхаланупа ăнтăлу сунаççĕ.