09 апреля 2010 г.
Çурхи кун вăй илсе пыни кунсерен ытларах та ытларах сисĕнме пуçларĕ. Çурхи кун поэзи çыннисемшĕн çут çанталăк чĕрĕлĕвĕпе сăнарланать пулсан, çĕр çыннисемшĕн - çĕр пиçсе çитнипе.
Çĕр ĕçĕ çур аки е кĕр аки - пурте питĕ яваплă, пур ĕçе те вăхăтра туса ĕлкĕрмелле, унсăрăн тухăç илессе шанма çук. Юлашки çулсенче пирĕн районта пур агротехникăлла ĕçсене те вăхăтра туса пырас тесе çине тăни куç умĕнчех. Çакна туса илнĕ кăтартусем çулсерен ÿссе пыни те лайăх çирĕплетсе параççĕ. Çум курăк ÿссе япăхса выртакан çĕрсене пусă çаврăнăшне кашни çулах ытларах та ытларах кĕртсе пытăмăр, ку ĕç кăçал та малалла пырĕ. Иртнĕ çул кĕрхи культурăсене 6511 гектар акса хăварнă, çурхисене планпа 9500 гектар акма палăртнă. Кăçал çанталăк халичченхипе танлаштарсан ытларах сивĕ тăчĕ, çавна пула кĕрхи культурăсене малтанлăха тĕрĕсленĕ тăрăх, акнинчен 10 проценчĕ сивĕпе пĕтнĕ тесе палăртнă. Вĕсене тепĕр хут акма та вăрлăх кирлĕ. Çапла вара
çурхи культурăсене акма 2278 тонна вăрлăх кирлĕ пулать, вĕсенчен 2111 тоннине тĕрĕсленĕ, ку 93 процент пулать, çав шутран 1500 тонна кондициллĕ. Ку енĕпе «Урмарская» кайăк-кĕшĕк фабрикипе «АгроВладина», «Шигали», «Вăтам Энĕш», «Сарабай» хуçалăхсем, «Г.Ямуков», «В.Иванов» хресчен (фермер) хуçалăхĕсем лайăх ĕçлесе пыраççĕ. Паянхи куна илсен, районти хуçалăхсенче тракторсен 87 проценчĕ, автомобильсен - 89, культиваторсен - 91, сеялкăсен - 81, плугсен 93 проценчĕ юсавлă. Техникăна ĕçлеттерме планпа палăртнинчен дизтопливо 54,2 процент, бензин 48,2 процент хатĕр. Удобренисене те çителĕклĕ таран хатĕрлесе хума палăртнă. Паянхи куна 1234 тонна пур, планпа 2251 тонна кирлĕ. Çур аки алăкран шаккать, çавăнпа пур ĕçе те вăхăтра, агротехника требованийĕсем ыйтнă пек пурнăçлама паянах хатĕрленсе çитме тăрăшмалла.